Буюк Британияда украиналик аскарлар энди беш ҳафта ўрнига етти ҳафталик тайёргарликдан ўтади. Мутахассислар буни Киевнинг жасур қарори деб баҳолаб, “аскарларнинг миқдоридан кўра сифатига таяниш самаралироқ”, дея таъкидламоқда.
Буюк Британия бошчилигидаги ўқув дастурига раҳбарлик қилаётган полковник Бордман интервюсида курсларнинг узайтирилиши онгли танлов эканини айтди. Унинг сўзларига кўра, Украина қисқароқ тайёргарлик курсларини танлаб, кўпроқ аскарни тезроқ фронтга юбориши мумкин эди, бироқ бошқа йўлни афзал билди.
“Аскарларни узоқроқ вақт қолдиринг ва уларни яхшироқ қилинг”, деди Бордман.
Оддий украиналик аскарнинг тайёргарлиги рус аскариникидан анча юқори, чунки рус аскарлари кўпинча фақат бир неча кун тайёргарликдан ўтади, холос.
Бордман таъкидлашича, Россия армияси сон устунлигига таянади ва бу минглаб яхши тайёрланмаган аскарларнинг ҳаётига зомин бўлмоқда. Ғарб экспертлари бу тактикани “гўшт майдалагич” деб атаган. АҚШ армиясининг янги ҳисоботида эса Москва жанг майдонида яна “советча” услубга қайтиб, сифат ўрнига миқдорни, аниқлик ўрнига эса шафқацизликни танлаётгани ёзилган.
Украина эса мутлақо қарама-қарши йўлни танлаб, душманнинг сон устунлигини сифат ва самарадорлик орқали йўққа чиқаришга интилмоқда.
2022 йилдан бери Буюк Британия ва бошқа иттифоқчилар “Интерфлек” операцияси доирасида 56 мингдан ортиқ украиналик ҳарбийни тайёрлади. Қўшимча курслар эса мамлакатнинг ўзида ташкил этилмоқда.
2024 йил охирида Киев ички тайёргарлик машғулотларини ҳам 30 кундан 45 кунгача узайтирди. Президент Владимир Зеленский буни қуйидагича изоҳлаган эди: “Аскарларимизнинг жангдаги самарадорлигида ва йигитларимизнинг ҳаёти сақланиб қолишида тайёргарлик сифати муҳим аҳамиятга эга”.
