Туркия президенти Ражаб Тоййиб Эрдўғон Россия ва Украина раҳбарлари Владимир Путин ҳамда Владимир Зеленский билан мулоқотдан сўнг уларнинг учрашувга тайёр эмаслигини маълум қилди. Унинг сўзларини “Миллиет” газетаси келтирган.
“Мен президентлар ҳам Зеленский, ҳам Путиннинг ёндашувларини ижобий баҳоладим. Биз Туркияда Истанбул жараёнини давом эттиришни таклиф этганимизда, Зеленский “Нега йўқ?” деб рози бўлди. Аммо улар ҳали бунга тайёр эмаслар”, деди Эрдоғон.
Унинг айтишича, Туркия раҳбарияти доимо Украинадаги можарони музокаралар орқали ҳал этиш мумкин, деган фикрда бўлиб келган ва шу сабабли бу жараённи давом эттириш учун ҳаракат қилмоқда.
Туркия етакчиси Анқара тинчликка бўлган умидни аниқ натижаларга айлантириш мақсадида музокаралар даражасини аста-секин оширишга интилаётганини таъкидлаган.
АҚШ президенти Доналд Трамп 15-август куни Аляскада Путин билан, ундан сўнг эса 18-август куни Оқ уйда Зеленский ва Европа раҳбарлари билан учрашгандан кейин яқин келажакда аввал Путин ва Зеленскийнинг шахсий учрашувини, сўнгра президентларнинг ўзи иштирокидаги уч томонлама учрашувини ташкил этишни режалаштирганини билдирди. Бу учрашувлар можарони ҳал қилиш йўлидаги жиддий қадам бўлиши кутилмоқда. Бироқ улар қачон ва қаерда ўтказилиши мумкинлиги ҳақида ҳозирча маълумот йўқ.
30-август куни Трамп Путин ва Зеленский ўртасидаги учрашув амалга ошишига ишончи комил эмаслигини, аммо уч томонлама учрашув албатта бўлиб ўтишини айтганди.
