Украина президенти Владимир Зеленский 31 август куни Россияга қарши янги, чуқурроқ зарбалар берилишини маълум қилди. Бу ҳақда президент офиси хабар берди.
Зеленский бу баёнотни Украина армияси бош қўмондони Александр Сирскийнинг фронтдаги вазият ҳақидаги ҳисоботидан сўнг эълон қилди. Унга кўра, Россия армияси асосий эътиборини Покровск йўналишига қаратган ва натижада катта талафот кўрмоқда.
“Донецк вилоятида Мудофаа кучлари белгиланган вазифаларни бажаришда давом этмоқда ва босқинчиларни йўқ қилмоқда”, деди Зеленский.
Президентнинг сўзларига кўра, 2025 йилнинг саккиз ойида россияликлар фронт бўйлаб 290 мингдан ортиқ аскарини йўқотган, улар орасида ҳалок бўлганлар ҳам, оғир ярадорлар ҳам бор. Энг катта йўқотиш Донецк вилоятида қайд этилган. Шунга қарамай, Россия бирор стратегик мақсадига эриша олмаган.
“Фронтнинг айрим участкаларида барқарорликни сақлаш бўйича ишлар давом этмоқда. Украина учун алмашинув фондини тўлдираётган ҳар бир бўлинмадан миннатдорман. Ҳар ҳафта бу борада натижалар бор”, деди Зеленский.
Президент Сирский билан учрашувда Запороже йўналиши, шунингдек, Суми ва Харков вилоятларининг чегара ҳудудларидаги вазиятни ҳам муҳокама қилди.
“Украинанинг мудофааси учун зарур бўлган шаклда фаол операцияларимизни давом эттирамиз. Куч ва ресурслар тайёр. Янги зарбаларни Россиянинг ичкарироқ ҳудудларига йўналтириш режалаштирилган”, деди у.
29-август куни Зеленский мудофаа кучлари Харков ва Донецк вилоятларида фаол ҳаракатлар олиб бораётганини, бу эса россияликлар учун қийинчилик туғдираётганини айтган эди. 31 август куни эса Украина Бош штаби Россиянинг ёзги ҳужуми деярли муваффақияциз тугаганини ва белгиланган мақсадларга эриша олмаганини таъкидлади.
