Португалия президенти Марселу Ребелу де Соуза Америка раҳбари Доналд Трампни “совет ёки рус агенти”га ўхшатди. Бу ҳақда Portugal Pulse портали хабар бермоқда.
“Дунёнинг етакчи қудратли давлати раҳбари обектив равишда совет ёки рус агенти ҳисобланади. У агент каби ҳаракат қилмоқда”, деди сиёсатчи.Президентининг фикрича, бу “дўстлик, иқтисодий, ғоявий ёки назарий яқинликка асосланган иттифоқ” эмас. У АҚШнинг янги раҳбарияти Россияга “стратегик жиҳатдан ёрдам берган”ини таъкидлаган.
“Трамп даврида Қўшма Штатлар ‘бир томоннинг иттифоқчисидан ҳакамга айланди’, бироқ Украина ва Европани жараёндан четлаштириб, фақат ‘бир жамоа’ билан музокаралар олиб боришни истайди”, дея қўшимча қилди де Соуза.Португалия раҳбари АҚШ томонидан деярли ҳар куни Москвага нисбатан санксиялар қўллаш бўйича “даҳшатли таҳдидлар” янграётганини, аммо амалда Трамп уларни бажармаётганини қайд этган.
Де Соуза АҚШ президентини “янгича услубда” кўпроқ ҳиссий ва тўғридан тўғри, воситачиларсиз, фуқаролар билан мулоқот қиладиган сиёсий етакчи сифатида тавсифлаган.
Бундан аввал Трамп ҳеч кимнинг тарафини олмаслигини, бироқ одамлар ўлимини тўхтатишни истаганини айтган эди. 22-август куни у Россия ва Украина можароси ҳал этилмаса, икки ҳафта ичида “жуда муҳим қарор” қабул қилишни ваъда қилди. Бир неча кундан сўнг у Москва учун “салбий оқибатларга олиб келадиган” “иқтисодий уруш”ни назарда тутиб, бу ҳолат учун жиддий чораларни кўриб чиқаётганини маълум қилди.
Бундан олдин у Россияга ултиматум қўйиб, тинчлик жараёнида ривожланиш бўлмаса, мамлакат ва унинг савдо ҳамкорларига нисбатан божлар жорий этишни ваъда қилганди. Муддат 8-августда тугади, 15-августда эса Трамп Россия президенти Владимир Путин билан Аляскада учрашувдан сўнг санксиялар ҳақидаги қарорни кечиктирди.
