Манбага кўра, Нетаняху америкалик тадбиркор ва подкастчи Патрик Бет-Девидга берган интервюсида буни айтган. Суҳбат 26-август куни эълон қилинган.
Патрик бош вазирга “Нега шу пайтгача ҳеч бир исроиллик бош вазир турклар томонидан арманлар, оссурийлар ва юнонларнинг ўлдирилишини геноцид деб атамаган” деган савол берди. Бунга жавобан Нетаняху шундай деди: “Ҳа, мен ҳозиргина буни қилдим. Тамом”.
Туркия бош вазири Нетаняхунинг сўзларини қоралаб чиқди. Туркия Ташқи ишлар вазирлигининг баёнотида эса шундай дейилади: “Фаластин халқига қарши геноцидда айбланаётган Нетаняху ўзи ва ҳукумати содир этган жиноятларни яширишга уринмоқда”.
Исроил 1915-1916-йиллардаги воқеаларни расмий равишда геноцид сифатида тан олишдан тийилиб келган эди. Тарихчиларнинг фикрича, Усмонли империясининг мунтазам қирғинлари оқибатида 1,5 миллион арман ҳалок бўлган. Кнессетда бу масала бўйича турли ташаббуслар кўтарилган бўлса-да, уларнинг бирортаси расмий овоз бериш билан якунланмаган.
Исроилнинг бундай эҳтиёткорлиги Туркия билан муносабатларни сақлаб қолишга уриниш билан изоҳланарди. Бироқ сўнгги йилларда бу муносабатлар кескин ёмонлашди. Айниқса, Исроилнинг фаластинликларга нисбатан олиб бораётган сиёсати фонида бу яққол кўринади. Туркия президенти Ражаб Тоййиб Эрдўғон 2023-йилда Исроилни Ғазо секторида геноцид содир этганликда айблаган эди.
