АҚШ президенти Дональд Трамп 21 август куни кечқурун пойтахт Вашингтон кўчаларида ҳуқуқни муҳофаза қилиш органлари ва Миллий Гвардия ходимлари билан бирга патруллик қилди. Бу ҳақда Fox News хабар берди.
Маълум қилинишича, бу ҳаракат Трамп маъмуриятининг шаҳарда федерал назоратни ўрнатиши ва жиноятчиликка қарши кескин чоралари доирасида амалга оширилган.
Биз ажойиб натижаларга эришдик, шаҳарда энди бошқача муҳит ҳукм суради. Жиноятлар сони кутилганидан ҳам камроқ бўлади, деди АҚШ президенти.
Вашингтон полициясига кўра, федерал назорат бошланганидан бери шаҳарда бир ҳафтадан кўпроқ вақт давомида қотиллик содир бўлмаган. Трамп сўзга чиқиб, йиғилганларга шундай мурожаат қилди:
Сизларни кўриб шуни тушуняпманки, бу ерда ҳеч қандай ўйин-кулги бўлмаяпти. Биз хавфсизликни таъминлаймиз, кейин бошқа масалаларга ўтамиз. Ҳозирча айнан шу иш билан шуғулланамиз. Пойтахтни мукаммал қилиш истагидамиз.
Трамп, шунингдек, шаҳар кўчаларини таъмирлаш ва деворлардаги графиттиларни (девор суратлари) тезда тозалаш режасини эълон қилган.
Парклар ва жамоат жойларини қайта тиклаймиз. Уларни “Аугуста” ёки Trump National Golf Club даражасига олиб чиқамиз, деди у.
Маълумот ўрнида, АҚШ президенти август ойининг бошларида пойтахтдаги жиноятчиликни камайтириш саъй-ҳаракатлари доирасида Вашингтонга 800 нафар миллий гвардия қўшинини сафарбар қилганди. Шундан кейин, Огаё, Ғарбий Виржиния, Жанубий Каролина, Луизиана, Миссисипи ва Теннесси штатлари қўшинлари ҳам Трампнинг ушбу ташаббусини қўллаб-қувватлаш учун жалб қилинган. Шунингдек, Трамп 10 август куни пойтахтдаги уйсизлардан дарҳол шаҳарни тарк этишни талаб қилганди.
