Кенияда Найробидаги полиция ҳибсхонасида 31 ёшли блогер Алберт Омонди Ожуангнинг ҳалок бўлиши ортидан оммавий норозилик намойишлари авж олди. Бу ҳақда BBC хабар бермоқда.
Эркак юқори лавозимли полиция ходимини танқид қилгани учун қўлга олинган. У ўзининг туғилган шаҳри Хома-Бейда ҳибсга олиниб, маҳаллий тергов ўрнига пойтахтга олиб кетилган ва у ерда оғир бош жароҳатларидан вафот этган. Бироқ экспертиза хулосаларига кўра, блогернинг бошига зарба етказилган ва унинг ўлими, эҳтимол, ҳужум оқибатида юз берган.
Полициянинг расмий баёнотига кўра, Ожуанг ўз бошини камера деворига уриб, ўзига жароҳат етказган. Бироқ жамоатчилик бу изоҳга ишонмайди ва уни Жанубий Африкадаги апартеид давридаги усулларга ўхшатмоқда.
Намойишлар 9 июнь куни Найробида бошланиб, марҳумнинг жасади сақланаётган морг ёнида давом этган.
Инсон ҳуқуқлари ташкилотлари содир бўлган воқеани қаттиқ қоралади ва мустақил тергов ўтказилишини талаб қилмоқда.
“Суд тизими қатл қуроли бўлмаслиги керак. Жазосизликка чек қўйиш лозим”, деди Халқаро юридик комиссиянинг Кениядаги бўлими раҳбари Протас Саэнде.
Блогернинг ҳалок бўлиши 2023 йилда солиқлар оширилишига қарши норозилик намойишларидан сўнг кучайган полиция шафқатсизлиги айбловларининг навбатдаги кўриниши бўлди. Ўшанда, ҳуқуқ ҳимоячилари маълумотларига кўра, камида 39 киши ҳалок бўлган, юзлаб одамлар яраланган, кўпчилик бедарак йўқолган.
