Исроил Ғазо секторида бир қанча янги объектлар қурилишини бошлади. Улар гуманитар ёрдамни тақсимлаш марказлари сифатида фойдаланилиши мумкинлиги айтилмоқда. Бу ҳақда BBC сунъий йўлдошдан олинган расмларга таяниб хабар берди.
BBC Verify томонидан таҳлил қилинган суратларга кўра, бир қанча ер участкалари қурилишга ҳозир қилиб тозаланган. Жумладан, сўнгги ҳафтада Ғазо жануби ва марказида янги йўллар ва қурилиш майдончалари пайдо бўлган.
Исроил бундай тақсимлаш марказлари қаерда бўлишини очиқ айтмаган. Ғазонинг жанубий қисмида камида тўртта марказ, шимолроқда, яъни ҳарбийлар назоратидаги Нетзарим йўлаги яқинида яна биттаси қурилмоқда.
“Ғазо гуманитар жамғармаси” Исроилни тарқатиш марказлари тўлиқ ишга тушгунга қадар одатдаги каналлар орқали ёрдам кўрсатишга рухсат беришга чақирган. Ғазо шимолида дастлабки режада кўзда тутилмаган ёрдам марказларини қуриш ташаббуси билан чиққан.
Бу жамғарма Ғазода давом этаётган гуманитар инқироз даврида инсонпарварлик ёрдамни тарқатиш учун очилган. У дастлаб 1,2 миллион кишига, яъни аҳолининг 60 фоизидан камроғига озиқ-овқат, сув ва гигиена тўпламлари етказиб берилишини маълум қилган эди. 14 май куни у ойнинг охиригача иш бошлашини эълон қилган.
Маълум бўлишича, таклиф этилаётган янги тизим ҳали Исроил ҳукумати томонидан имзоланмаган. Исроил 2 мартдан бери Ғазо секторига гуманитар ёрдам олиб киришни тўхтатиб қўйган. Оқибатда анклавда 57 нафар бола вафот этган, кучли очарчилик бошқаларга ҳам хавф солмоқда.
