“Пари Сен-Жермен” ҳужумчиси Усмон Дембеле Чемпионлар Лигаси тарихида ўзига хос натижа қайд этди. Бу ҳақда Squawka нашри хабар берди.
Футболчи “Арсенал”га қарши жавоб баҳсида (2:1) голли узатма муаллифига айланди. Бу орқали Дембеле Франция клублари футболчилари ичида Чемпионлар Лигаси тарихида бир мавсумда энг кўп самарали ҳаракат (гол+ассист) қайд этган футболчига айланди. У ЕЧЛ доирасидаги 14 та ўйинда майдонга тушиб, ўз ҳисобига 8 та гол ва 4 та ассистни ёздириб қўйган.
Эътиборлиси, Дембеле жавоб ўйинида иштирок этадими-йўқми — сўроқ остида эди. Чунки у дастлабки баҳсда (1:0) тиззасидан жароҳат олганди. Бироқ футболчи тикланиб, Париждаги ўйиннинг иккинчи бўлимида захирадан майдонга тушди ва Ҳакимининг голига ҳаммуаллифлик қилди.
Маълумот учун, жорий мавсумда Дембеле барча мусобақаларда 46 та ўйинда қатнашиб, 33 та гол ва 13 та ассистга муаллифлик қилган. Transfermarkt портали унинг бозор қийматини 75 миллион еврога баҳолаган. Усмоннинг парижликлар билан амалдаги шартномаси 2028 йилнинг ёзигача мўлжалланган.
