Ўзбекистон Суперлигаси 5-тури доирасидаги “Хоразм”—“ОКМК” ҳамда “Пахтакор”—“Андижон” баҳслари якунига етди. Урганчда кечган баҳс тақдирини ягона гол ҳал қилган бўлса, Тошкентдаги учрашувда жамоалар 5 та гол уришди.
Хоразмдаги учрашув қизғин курашлар остида бошланди. Биринчи таймнинг 37-дақиқасида майдон эгалари ҳисобда олдинга чиқиб олиши мумкин эди, лекин Темур Тўхтасинов томонидан белгиланган пенальтини Дилшод Жўраев аниқ амалга ошира олмади.
Иккинчи тайм ҳам қизиқарли вазиятлар остида ўтди. Учрашув якуни арафасида Олмалиқ клуби ғалаба тўпини киритди. 90+8-дақиқада Ойбек Рустамов Асад Собиржоновнинг ажойиб узатмасидан кейин Сардор Қобулжонов қўриқлаётган дарвозани ишғол қилди.
Шу тариқа Миржалол Қосимов бошчилигидаги “ОКМК” сафардан 3 очко билан қайтди. Ҳозирда олмалиқликлар 13 очко билан онлайн турнир жадвалида етакчилик қилмоқда. “Хоразм” 6 очко билан 9-поғонани эгаллаб турибди.
Тошкентда бўлган баҳсда жамоалар 5 та гол киритишни уддалашди. Учрашувнинг биринчи бўлимида мухлислар голларга гувоҳ бўлмади. аммо иккинчи таймда “Андижон” кетма-кет икки марта Жонатан қўриқлаётган дарвозага йўл топди.
56-дақиқада Дониёр Абдуманнопов ҳисобни очган бўлса, 60-дақиқада Рустам Турдимуродов жамоасининг иккинчи голига муаллифлик қилди.
Орадан 8 дақиқа ўтиб, Игор Сергеев таблодаги ҳисобни қисқартирди. 81-дақиқада андижонликлар яна ҳисобдаги фарқни иккитага етказиб қўйди. Гол муаллифи — Лука Ускокович. 84-дақиқада Башар Ресан “Пахтакор”нинг иккинчи голини киритди.
Учрашувнинг қолган дақиқалари ҳам қизғин курашларга бой ўтди, аммо дарвозалар бошқа ишғол қилинмади. Шу тариқа “Андижон” сафардан 3 очко билан қайтди. Қўлга киритилган ғалабадан кейин Александр Хомяков жамоаси ҳисобидаги очколар сони 9 та бўлди ва турнир жадвалининг 4-поғонасидан жой олди. “Пахтакор” 3 очко билан 13-ўринни эгаллаб турибди.
Ўзбекистон Суперлигаси
5-тур
13 апрель, якшанба
“Хоразм” — “ОКМК” 0:1Гол: 0:1 — Ойбек Рустамов (90+8)
“Пахтакор” — “Андижон” 2:3
Голлар: 0:1 — Дониёр Абдуманнопов (54), 0:2 — Рустам Турдимуродов (60), 1:2 — Игор Сергеев (68), 1:3 — Лука Ускокович (81), 2:3 — Башар Ресан (84)
