АҚШ президенти Дональд Трамп 14 июнь куни нишонланадиган армиянинг 250 йиллик юбилейи муносабати билан катта ҳарбий парад ўтказмоқчи. Бу ҳақда The Hill хабар берди.
Парад бўлиб ўтиши кутилаётган кунда АҚШ президенти 79 ёшни қаршилайди. Парад ҳақида биринчи бўлиб ёзган Washington City Paper газетасига кўра, унинг йўналиши 4 милга (деярли 6,5 километр) — АҚШ Мудофаа вазирлигининг Арлингтон штаб-квартирасидан Оқ уйгача чўзилади.
Маҳаллий маъмурият ва қуролли кучлар вакиллари Тhe Hill ва NewsNation нашрларига бундай режалар борлигини тасдиқлаган. Бироқ улар бу борада расмий ҳужжат ёки буйруқ йўқлигини таъкидлаган. Маҳаллий ҳокимият ҳозирча парад режалари ҳақида фақат хабардор қилинган.
Тадбирни режалаштириш 2024 йил бошланган. Бу жараёнда Вашингтон ҳокимияти ва армия муҳандислари иштирок этган.
Армия ўзининг 250 йиллик юбилейини бутун округ билан нишонлашдан жуда мамнун. Биз америкаликлар ўз армияси ва миллати билан фахрланишини истаймиз. Ҳозирча парад бўлиши ёки йўқлиги ҳақида гапириш учун эрта, аммо биз байрамни миллий миқёсдаги тадбирга айлантириш учун Оқ уй ва бир қатор ҳукумат идоралари билан ҳамкорлик қилмоқдамиз, дейди армия вакили полковник Дейв Батлер.
Трамп ўзининг биринчи президентлик муддати давомида 2018 йилда ҳарбий парад ўтказмоқчи бўлган, бироқ тадбирнинг юқори қиймати, тахминан, 92 миллион долларга (тахминан 84 миллион евро) тушиши туфайли у ўтказилмаган. Бундан ташқари, шаҳар ҳукумати танклар ва бошқа оғир зирҳли техникалар улар ўтадиган йўлларга жиддий зарар етказишидан хавотирда бўлган. Вашингтонда 27 йил ичида биринчи йирик ҳарбий парад 2019 йилда бўлиб ўтди. У 4 июль АҚШ Мустақиллик куни ташкил этилди.
