Кино олами кўпчилик учун орзулар мамлакатидек туюлади. Аммо шундай санъаткорлар борки, актёрликни ҳеч қачон режа қилмаган, ҳаттоки бу касб ҳақида орзу ҳам қилмаган. Улар умуман бошқа соҳаларда таълим олган ёки мутлақо ўзгача касбда фаолият бошлаган ва натижада тасодиф ёки қизиқиш туфайли камера қаршисида пайдо бўлишган.
Ушбу мақолада биз турк киноси юлдузларининг асл касблари ва улар қандай қилиб машҳурликка эришгани ҳақида сўз юритамиз.
1. Бурак Ўзчивит
“Муҳташам юз йил” ва “Ҳукмдор Усмон” сериаллари юлдузи болалигидан экран ҳақида орзу қилган, лекин ўша пайтда ўзини мультфильм қаҳрамони сифатида кўрган. Аввалига тасвирий санъат факультетида ўқиган. Унинг отаси Буракни оилавий ресторанида ишлашини хоҳлаган, аммо йигит бошқа йўлни танлаган ва модел бўлиб ишлай бошлаган. Маълум вақтдан сўнг Ўзчивит “Мамлакатнинг энг яхши модели” ва “Дунёнинг энг яхши модели” унвонларини қўлга киритганидан сўнг, продюсерлар назарига тушган. Ҳозирда эса турк сериалларини кўрмайдиган одамлар ҳам уни яхши танийди.
2. Фаҳрие Эвжен
Бурак Ўзчивитнинг рафиқаси, “Чолиқуши” сериали орқали танилган Фаҳрие Эвжен актёрликка ҳеч қачон келмаслиги мумкин эди, чунки Германияда туғилган ва Дюссельдорф университетида жамияцҳунослик факультетида ўқиган. Гарчи болалигида театр тўгарагига қатнашган бўлса-да, актрисалик карьераси ҳақида умуман ўйламаган. Таътил пайтида унга “Ҳеч қачон унутма” сериалида ўзини синаб кўриш таклиф қилинган, орадан кўп ўтмай “Ҳазонрезги” сериалида ҳам рол ўйнаган. Сўнг Эвжен университетни ташлаб кетган ва Босфор университетида тарих йўналишига ўқишини кўчирган.
3. Керем Бурсин
“Қалбим эшигини қоқ” сериали юлдузи Керем Бурсин оиласи билан тез-тез турли мамлакатларга кўчиб юрган. Дастлаб у узоқ вақт АҚШда яшаб, таълим олган. Халқаро компания раҳбари бўлган отаси унга барқарор келажак тақдим этадиган касб танлашни тавсия қилган. Азалдан кинога қизиққан Керем отасини хафа қилмаслик учун маркетинг факультетига кирган, бироқ яширинча актёрлик курсларига қатнаб юрган. Онаси унинг танловини қўллаб-қувватлаган. Керемнинг мақсади — Голливудни забт этиш, лекин ҳозирда у турк сериаллари ичидаги энг келишган актёрлардан бири сифатида танилган.
4. Жанан Эргудер
“Оила” ва “Менежеримга қўнғироқ қилинг” сериаллари актрисаси Жанан Эргудер политология фанлари профессорининг қизи. У аввал Истанбул университетида ўқиган, бир йилдан кейин АҚШга кўчиб, у ерда Франклин ва Маршалл коллежида социология ва театр санъати бўйича таҳсил олган. Бакалавр даражасини олгач, Нью Йоркдаги актёрлик мактабида магистрлик даражасини олган. Актриса инглиз, немис ва италян тилларида бемалол сўзлаша олади. Ҳозирда кино билан бир қаторда, театрда ҳам фаол иштирок этади.
5. Чағатай Улусой
“Ҳимоячи”, “Ичкарида” сериаллари юлдузи серқирра истеъдод эгаси. У болалигидан спорт билан профессионал шуғулланган, шунинг учун у баскетбол мураббийи бўлиши мумкин эди. Аммо атрофидагилар унинг кўринишини моделликка муносиб деб ҳисоблашган. Улусой ландшафт дизайни факультетида ўқиган. Шу билан бирга актёрлик курсларига қатнашган ва моделлик орқали пул топган. Маълум вақтдан сўнг ҳатто “Туркиянинг энг яхши модели” унвонига сазовор бўлган.
6. Берен Саат
“Таъқиқланган муҳаббат” ва “Муҳташам юз йил: Кўсем империяси” сериаллари юлдузи болалигида қўшиқ куйлашга қизиққан ва ота-онаси уни мусиқа мактабига берган. Берен кўплаб танловларда ғолиб бўлган. Ёш иқтидорлар танловида эса актёрлик салоҳияти эътироф этилиб, унга бу йўналишда ўзини ривожлантириш истаги пайдо бўлган. Аммо Саат Анқара университетда менежмент бўйича ўқиган. Чунки бу касб актрисаликдан кўра барқарор эканлигига ишонган.
7. Толга Сариташ
“Ота” ва “Ваъда” сериаллари юлдузи Толга Сариташ болалигидан мусиқага қизиққан: у гитара ва барабан чалган, ўзи тузган гуруҳи билан саҳналарда чиққан. Саккиз ёшидан ҳаваскор театрда ишлаган. Аммо ота-онаси ижодий касбларни жиддий деб ҳисобламагани боис уни география факультетига йўналтиришган. Аммо актёрлик машғулотлари туфайли Толга дарслардан узоқлашган, натижада у ўқишни масофавий шаклда давом эттирган.
8. Афра Сарачўғлу
“Қўрғон сирлари” ва “Устозлар” сериаллари юлдузи жуда эрта ёшидан мустақил шахсга айланишга мажбур бўлган. Отаси болалигида оилани тарк этган, онаси эса фарзандини таъминлаш учун кўп меҳнат қилган. Афра онасининг ёрдамисиз ҳеч нарса бўлмаслигини тушунган ва ўспиринлигидаёқ моделлик агентлиги билан шартнома имзолаган. Сўнг кино кастингида қатнашиб, илк ролга қабул қилинган. Ўша пайтда Афра адабиёт факультетида таҳсил олаётган бўлган.
9. Ҳалит Эргенч
“Муҳташам юз йил” ва “Бобил” сериаллари юлдузи Ҳалит Эргенч ўзини турли касбларда синаб кўрган. Унинг отаси машҳур актёр, бастакор ва шоир бўлган. Кўпчилик Ҳалит ҳам шу йўлдан боради деб ўйлаган, бироқ у кутилмаганда денгизчи бўлиш истагини билдирган. У узоқ масофаларга денгиз орқали амалга ошириладиган сафарларга жуда қизиққан. Аммо бу касб кўплаб техник билим талаб қилгани учун тез орада консерваторияга ҳужжат топширган.
10. Бариш Ардуч
“Қўрғон сирлари” ва “Алп Арслон: Буюк Салжуқий” сериаллари юлдузи болалигида паҳлава сотувчиси бўлишни орзу қилган. Кейинчалик спортга қизиқиб, спорт академиясида бир йил гранти асосида ўқиган. Аммо ички бир туйғу уни санъатга етаклаган ва актёрлик факультетида таҳсил ола бошлаган. Бариш Ардуч узоқ йиллар қутқарувчи бўлиб ишлаган ва юзлаб одамларни ҳалокатдан сақлаб қолган.
11. Жан Яман
“Жаноб Хатолик” ва “Эл Турко” сериаллари юлдузи актёрликка кечроқ қадам қўйган. Дастлаб у ҳуқуқшунос бўлиб ишлаган. Мактабда аъло баҳоларга ўқиган, Истанбул коллежига тарихдаги энг юқори балл билан кирган, адвокатлик билан шуғулланган ва ўзининг адвокатлик бюросини ташкил этган. Ҳобби сифатида театр курсларига қатнаган. Сўнг дўстлари уни саҳнада кўриб, кинога киришини маслаҳат берган. Натижада Жан Яман муваффақиятли актёр бўлиб етишган. Ҳозирда ҳам у асл касбидан бутунлай воз кечмаган — у адвокатлик фирмасининг директори ҳисобланади.
