Германия Иқтисодиёт ва иқлимни муҳофаза қилиш вазирлиги Украина энергетикасини қўллаб-қувватлаш жамғармасига қўшимча 7,27 миллион евро ажратди. Бу ҳақда вазирлик сайтига жойланган баёнотда маълум қилинди.
Германия Федератив Республикаси Иқтисодиёт ва иқлимни муҳофаза қилиш вазирлиги Европа энергетика ҳамжамияти тасарруфига Украина энергетика инфратузилмасини тиклаш учун қўшимча 7,27 миллион евро тақдим этади. Маблағлар 2022 йилда ҳамжамият доирасида ташкил этилган Украина энергетикасини қўллаб-қувватлаш халқаро жамғармасига ўтказилади, дейилади хабарда.
Таъкидланишича, Германия жамғарма фаолиятига энг катта молиявий ҳисса қўшмоқда. У 2022 йилдан буён жамғармага 390 миллион евродан ортиқ маблағ ўтказган.
Вазир Роберт Хабекнинг айтишича, Германия украиналикларни қатъият билан қўллаб-қувватлашда давом этади.
“Россиянинг Украина фуқаролик ва энергетика инфратузилмасига қарши ҳужумлари ҳамон тўхтовсиз давом этмоқда. Бу ҳужумлар Украина тинч аҳолисига жиддий зарар етказмоқда. Германия давом этаётган фавқулодда вазиятга жавобан Энергетика ҳамжамиятининг Украина энергетикасини қўллаб-қувватлаш жамғармасига яна бир бор ҳисса қўшмоқда. Беқарор вақтларда биз украиналик ҳамкорларимизни қатъият билан қўллаб-қувватлашда давом этамиз”, дейди Роберт Хабек.
