“Қаттиққўл хоним” фильмидаги кўплаб саҳналар суратга олинган Нью Йоркдаги квартира сотувга қўйилди. Бу ҳақда Mansion Global’га таяниб, “Правила жизни” хабар берди.
Лост услубидаги интерерга эга мазкур хонадон биринчи марта ўтган йилнинг октябрь ойида 8,99 миллион долларга сотувга қўйилган, бироқ кўчмас мулк харидорлари топилмаган. Ҳозирда уйнинг нархи 8,95 миллион долларга туширилган.
Квартира Нью Йоркнинг нуфузли Соҳо туманида олти қаватли бинонинг иккинчи қаватида жойлашган. Унда иккита ётоқхона, иккита ҳаммом ва сауна мавжуд. Шунингдек, хонадон замонавий спорт зали, 400 шиша винони ўз ичига олган шароб сақланадиган хона ва каминли меҳмонхонадан иборат.
Ҳозирда квартира Апартмент Сара дўкони асосчиси ҳамда Марк Шиллерга тегишли. Улар хонадонни 25 йил аввал сотиб олишган.
“Қаттиққўл хоним” фильми сюжетига кўра, бу хонадонда “Подиум” журнали бош муҳаррири лавозимига даъвогарлик қилаётган моделер Жеймс Холт яшаган. Энн Хетеуэйнинг қаҳрамони бу ердаги зиёфатга ташриф буюрган ва севгилиси билан учрашган.
Маълумот учун, энг нуфузли мода журналларидан бирида оддий қизнинг ишга кириши ва карьераси ҳақидаги “Қаттиққўл хоним” фильми 2006 йил июнь ойида чиққан. Лорен Вайсбергернинг “Prada кийган иблис” номли китоби асосида режиссёр Девид Фрэнкэл томонидан суратга олинган. Фильм Мерил Стрипга комедия жанридаги энг яхши актриса роли учун “Олтин глобус” мукофотини ва бош рол учун “Энг яхши актриса” номинацияда “Оскар” мукофотини олиб келган. Бюджети 35 миллион доллар бўлган лойиҳа кино кассаларида 326 миллион доллар йиғган.
Аввалроқ Дисней компанияси “Қаттиққўл хоним” фильмининг давомини суратга олиши ҳақида хабар берилди. Фильмнинг давоми бўйича музокаралар унинг режиссёри Девид Фрэнкэл томонидан олиб борилмоқда, сценарий муаллифи Алин Брош Маккенна. Мазкур хабарларга Дисней ҳозирча изоҳ бермаган.
Тахминларга кўра, фильмнинг кейинги қисмида “Подиум” журнали муваффақиятсиз кунларни бошидан кечириши ҳақида ҳикоя қилинади. Унинг бош муҳаррири Миранда Пристли йирик люкс бренд билан реклама шартномасини имзолашни режалаштиради. Бунинг учун у ўзининг собиқ ёрдамчиси, ҳозирда ўша брендда етакчи лавозимни эгаллаб турган Эмилидан ёрдам сўрайди.
