“Ливерпуль” ҳимоячиси Трент Александер-Арнольд 2025 йил 1 июлдан бошлаб Мадриднинг “Реал” клуби футболчисига айланади. Бу ҳақда журналист Саша Таволиэри ўзининг Х (собиқ Twitter) тармоғидаги саҳифасида хабар берди.
Манбага кўра, футболчининг агентлари “қироллик клуби” билан беш йиллик шартнома бўйича келишувга эришган. Александер-Арнольд янги клубида мавсумига 15 миллион евро (солиқлардан ташқари) маош олади. Шунингдек, ҳимоячига қўшимча мукофот пуллари ва шартнома имзолагани учун бонус ҳам берилиши режалаштирилган.
Сўнгги ҳафталарда “Ливерпуль” раҳбарияти 26 ёшли футболчи билан янги шартнома имзолаш бўйича ҳаракат қилиб кўрди. Бироқ Александер-Арнольд “Реал”га ўтишни истамоқда ва унинг бу қарорни ҳеч нарса ўзгартира олмайди, дея қўшимча қилинди манбада.
Эслатиб ўтамиз, Трент Александер-Арнольд “Ливерпуль” академияси тарбияланувчиси ҳисобланади. У асосий жамоа сафида 2016 йилдан буён ҳаракат қилиб келмоқда. Унинг мерсисайдликлар билан амалдаги шартномаси 2025 йилнинг июнида якунланади. Transfermarkt портали футболчининг қийматини 75 миллион еврога баҳоламоқда.
