АҚШ президенти Дональд Трамп Америка қуролли кучларига Ямандаги ҳусийларга қарши "қатъиятли ва кучли" ҳарбий ҳаракатларни бошлашни буюрди. Бу ҳақда у 15 март, шанба куни ўзининг Truth Social ижтимоий тармоғида маълум қилди.
Унинг айтишича, АҚШ Қуролли кучлари "ҳозирнинг ўзида" Америка кемаларини ҳимоя қилиш ва Қизил денгизда кема қатнови эркинлигини тиклаш мақсадида гуруҳнинг базалари, раҳбарлари ва ракетага қарши мудофаа тизимларига ҳаво зарбалари бермоқда.
Трамп ҳусийларни Америка ва бошқа кемалар, самолётлар ҳамда учувчисиз учиш аппаратларига қарши "тўхтовсиз қароқчилик, зўравонлик ва терроризм кампанияси" олиб боришда айблади. У АҚШнинг собиқ президенти Жо Байденнинг ҳаракатлари етарлича қатъий бўлмагани туфайли ҳусийлар ҳужумларни давом эттирганини таъкидлаган.
Трампнинг сўзларига кўра, гуруҳ кемаларга ҳужум қилишни тўхтатмагунча ва минтақада хавфсизлик тикланмагунча зарба бериш давом эттирилади. Шунингдек, у Эронга таҳдид қилиб, ҳусийларни қўллаб-қувватлашни "дарҳол тўхтатиш"ни талаб қилди ва агар аралашув давом этса, Теҳронни жавобгарликка тортишини ваъда қилди.
Америка оммавий ахборот воситаларининг хабарига кўра, Яман ҳусийларига қарши операцияда USS Harry С Тruman авиаташувчиси бошчилигидаги зарба гуруҳи иштирок этмоқда. Унинг таркибига учта эсминец ва битта крейсер киради. Минтақада АҚШнинг USS Georgia қанотли ракеталари билан қуролланган сувости кемаси ҳам фаолият юритмоқда.
Яман Ҳусийларининг соғлиқни сақлаш вазирлиги маълумотига кўра, АҚШ авиазарбалари натижасида 19 нафар тинч аҳоли ҳалок бўлган.
Яман пойтахти Санога берилган зарбалар оқибатида камида 13 киши ҳалок бўлиб, тўққиз киши яраланган. Шимолий Саада вилоятига уюштирилган ҳужумда эса яна олти киши жон берган. Қурбонлар орасида тўрт бола ва бир аёл бор.
ОАВ Америка зарбаларини ҳусийларнинг Исроил билан боғлиқ кемаларга ҳужумларни қайта бошлаш ҳақидаги баёноти билан боғламоқда.
