Америкаликларнинг ярмидан кўпи, жумладан, ҳар тўртинчи республикачи президент Дональд Трампни Россия билан жуда яқин алоқада деб ҳисоблайди. Буни Reuters/Ipsos томонидан ўтказилган сўров натижалари кўрсатмоқда.
Икки кун давом этган сўров натижаларига кўра, респондентларнинг 56 фоизи наздида Трамп Москва билан ҳаддан ташқари яқин муносабатга киришмоқда. Мазкур қарашни демократларнинг 89 фоизи, республикачиларнинг эса 27 фоизи қўллаб-қувватлаган. 40 фоиз респондентлар Оқ уй раҳбарининг Россия билан муносабатлари борасидаги хавотирларни рад этган. Яна 4 фоизи эса жавоб бермаган.
Ғарбнинг коллектив институтлари жиддий синовдан ўтмоқда
Трамп иккинчи президентлик муддатини бошлаганидан бери АҚШ ташқи сиёсатини кескин ўзгартирди. Жумладан, Владимир Зеленскийни Россия билан тинчликка интилмаётганликда айблаб, очиқ танқид қилди. Шунингдек, Киевни музокараларга мажбурлаш учун ҳарбий ёрдам ва разведка маълумотлари алмашинувини тўхтатиб қўйди.
Трампнинг Россияга билан илиқ муносабатлари, ўз навбатида, Европа пойтахтларини ташвишга солмоқда. Бу НАТО аъзоларини Вашингтонга боғлиқликни камайтириб, ўз хавфсизлиги ҳақида мустақил қайғуришга ундамоқда.
Reuters/Ipsos сўрови шунингдек, аксар америкаликлар Трампнинг Украинага ёрдам бериш бўйича “ўзига хос” ёндашувини қўллаб-қувватлаётганини кўрсатди. Сўралганларнинг 44 фоизи АҚШ Киевни қўллаб-қувватлаш эвазига унинг минерал ресурсларидан улуш олиши керак, деган фикрни маъқуллаган. Ушбу ғояни республикачиларнинг учдан икки қисми, демократларнинг эса бешдан бири ёқлаб чиққан.
Трампнинг ҳудудий экспансия режалари ҳаммага ҳам маъқул эмас
Сўров натижаларига кўра, америкаликлар Трампнинг АҚШ ҳудудини кенгайтириш бўйича режаларини маъқулламайди. Оқ уй раҳбари Гренландияни сотиб олиш, Канадани 51-штатга айлантириш, Панама каналини назоратга олиш, Ғазога эга чиқиш ҳақида бир неча бор гапирган. Сўров иштирокчилари унинг бу баёнотларини жиддий қабул қилмаган.
