Англиянинг “Манчестер Сити” клуби “Милан”нинг 27 ёшли чап қанот ҳимоячиси Тео Эрнандесни сотиб олиш ниятида. Бу ҳақда TEAMtalk нашри хабар бермоқда.
Манбада маълум қилинишича, франциялик футболчи ва “россонерилар” раҳбарияти ўртасидаги шартномани узайтириш бўйича музокаралар боши берк кўчага кириб қолган. Шу боис, “Милан” Эрнандеснинг трансфери бўйича таклифларни кўриб чиқишга тайёр ва футболчи учун 35 миллион евро талаб қилмоқда. Ушбу нарх “Манчестер Сити”ни тўлиқ қаноатлантирмоқда.
Италия клуби қишки трансфер ойнаси пайтида футболчини А сериянинг бошқа жамоаси, “Комо”га 50 миллион еврога сотишга рози бўлган эди. Француз футболчиси эса аутсайдер жамоа сафига ўтишдан бош тортди.
Тео Эрнандес жорий мавсумда барча турнирлар доирасидаги 35 та ўйинда майдонга тушиб, 4 та гол ва 5 та голли узатмага муаллифлик қилган. Унинг “Милан” билан амалдаги шартномаси 2026 йил ёзида якунига етади. Transfermarkt портали маълумотларига кўра, футболчининг нархи 50 миллион еврога баҳоланмоқда.
