Украиналик супер оғир вазн тоифасидаги боксчи Олександр Усик фаолиятини қачон якунлашни режалаштираётганини айтди.
“Менимча, боксчи сифатида бир ярим ёки икки йил қолди. Ўзимни яхши ҳис қиляпман. Яна иккита жанг ўтказишим керак. Ундан ортиғи эмас”, дейди Усик Sky Sports’га берган интервьюсида.
2024 йил май ойида Усик британиялик Тайсон Фьюрини мағлуб этиб, супер оғир вазн тоифасида мутлақ жаҳон чемпионига айланганди. Декабрда ўтказилган реванш жангида украиналик боксчи яна ғалаба қозонди.
Усик ҳозирча фаолияти давомида мағлубиятга учрамаган боксчи ҳисобланади. Боксчи ўтказилган 22 жангнинг барчасида ғалаба қозонган.
Аввалроқ Баҳодир Жалолов агар менга икки-уч ой вақт беришса, Усик билан жанг қилишга тайёр бўлишини маълум қилганди.
