Эрон президенти Масъуд Пезешкиён ва унга ҳамроҳлик қилган делегация 17 январь куни Москвага ташрифи чоғида нохуш вазиятга дуч келди. Бу ҳақда Iran International хабар берди.
Манбага кўра, Россия президенти Владимир Путин билан учрашиш учун Кремлга борган Пезешкиён ва унинг делегацияси эшик олдида деярли бир соат кутишга мажбур бўлган. Уларга Путин ҳали учрашувга тайёр эмаслиги айтилган. Эрон делегациясига залда кутиб туриш ёки меҳмонхонага қайтишни таклиф қилишган.
“Эрон президенти ва ҳамроҳлари ноқулай аҳволга тушиб, намоз ўқиш важи билан меҳмонхонага қайтган. Кейинроқ улар Путин билан учрашиш учун яна Кремлга борган”, дейди Iran International.
Россия эронлик журналистларга нисбатан яхши муносабатда бўлмагани айтилмоқда.
Путиннинг куттириш тактикаси
Путин мунтазам равишда жаҳон раҳбарларини уни кутишга мажбур қилган, бу собиқ КГБ ходимининг психологик тактикаси сифатида кенг тарқалган. Энг машҳур икки ҳолатда Путин Германия канцлери Ангела Меркель ва Украинанинг собиқ президенти Виктор Януковични тахминан тўрт соат куттирган.
Япония, Мўғулистон ва Исроил раҳбарлари уч соатгача кутишга мажбур бўлишган. 2003 йилда Путин Буюк Британия қироличаси Елизавета II ни деярли 15 дақиқа куттириб қўйган, бу ҳурматли монарх учун камдан кам учрайдиган ҳурматсизлик эди.
2012 йилда АҚШнинг ўша пайтдаги президенти Барак Обама Путиннинг кечикиши туфайли учрашувдан кейинги режаларини 40 дақиқага кечиктиришга мажбур бўлган.
Таҳлилчиларнинг фикрича, Путин бу ҳаракати билан ҳамкорларини довдиратиб қўйишни ва музокараларда устунликка эришишни мақсад қилган. Бу усул асосан Москванинг назаридан қолган раҳбарларга нисбатан қўлланган.
Эрон ва Россия нималарга келишиб олди?
Пезешкиённинг Москвага ташрифи пайтида Эрон ва Россия ўртасида ҳар томонлама стратегик шериклик меморандуми имзоланди.
Меморандумда томонлар турли соҳаларда, жумладан, мудофаа ва хавфсизлик йўналишида ҳамкорликни кучайтиришлари қайд этилган. Бироқ ҳужжатда томонларнинг бир-бири олдидаги ҳарбий мажбуриятлари кўзда тутилмаган.
Меморандумга кўра, томонлардан бирига ҳужум қилинган тақдирда, иккинчи томон тажовузкорга ҳеч қандай ёрдам кўрсатмайди. Бошқача айтганда, бу иттифоқчилик шартномаси эмас, балки ҳужум қилмаслик тўғрисидаги келишувдир.
Шунингдек, музокаралар якунида Россия Озарбайжон орқали Эронга 55 миллиард куб метргача рус газини етказиб бериш бўйича келишувга эришилганини маълум қилди. Ушбу баёнотга нисбатан Бокунинг муносабати ҳамон номаълумлигича қолмоқда.
