Яман ҳусийлари Исроил ҳудудини ўққа тутишни тўхтатганини маълум қилди. Бу ҳақда Эдиот Ахронот нашри хабар берди.
Ҳусийлар вакилига кўра, улар Исроил ва ҲАМАС ўртасида тузилган ўт очишни тўхтатиш тўғрисидаги битимга риоя қилади. Исроил ҳудудларини нишон олиш 19 январь кунидан, яъни келишув расман кучга киргандан сўнг тўхтатилади. Ҳусийлар Исроилнинг “минтақадаги барқарорлик ва хавфсизликка таҳдид бўлиб қолаётгани”ни таъкидлади.
15 январь куни Исроил ва ҲАМАС ҳаракати 460 кундан ортиқ давом этган урушдан сўнг ўт очишни тўхтатиш бўйича келишувга эришди. У Ғазодаги аксарият гаровдагиларни Исроил қамоқхоналаридаги маҳбуслар эвазига озод қилиш, ўт очишни тўхтатиш ва Исроил қўшинларини Ғазо секторидан босқичма-босқич олиб чиқишни назарда тутади.
Ҳусийлар 2023 йил октябрь ойида Ғазода уруш бошланганидан кўп ўтмай Исроилга ҳужум қила бошлашди. Улар шу пайтгача жами 350 дан ортиқ дрон ва ракеталарни учирди. Бундан ташқари, ҳусийлар Қизил денгиздаги Исроилга алоқадор кемаларга ҳужум қилмоқда. Улар буни Исроил армияси ҳаракатлари оқибатида ҳалок бўлаётган Ғазо аҳолиси билан бирдамлик белгиси сифатида амалга ошираётганини айтган.
