Словакия бош вазири Роберт Фицо Украина президенти Владимир Зеленскийнинг ҳарбий ёрдам сўрашини танқид қилиб, уни “тиланчи” деб атади.
Роберт Фицонинг баёноти парламент қўмитасининг йиғилишида янгради. Унда бош вазир Украина орқали Россия газининг Словакияга транзитини тўхтатиш оқибатлари ҳақида гапирди. Фицо Украина етакчисини ишончсиз деб атаб, “бўғзимгача тўйдим”, дея норозилик билдирди.
“Мен бу ерга Зеленский билан бир сафда бўлиш учун келганим йўқ. Тан оламан, бу менинг жонимга тегди. У Европани кезиб юрибди, тиланчилик қилиб, шантаж қилиб, бошқалардан пул сўраб юради. Бу нарсага чек қўйиш вақти келди”, деди Словакия бош вазири.
Украина ва Словакия ўртасидаги муносабатлар Киев Россия гази транзити бўйича шартномани узайтиришни рад этгани сабабли кескин ёмонлашди. 1 январь куни эрталаб газ оқими тўхтади.
Словакия президенти Петер Пеллегрини шу муносабат билан Украинага ташриф буюришдан бош тортишини маълум қилди. У президентлик лавозимида барча қўшни мамлакатларга ташриф буюрган, бироқ аввалроқ бундай ташриф режасини эълон қилган бўлса-да, шу пайтгача Киевда бўлмаган.
“Бундай вазиятда ҳозирча менинг Украинага боришим ҳақида гап бўлиши мумкин эмас. Агар мен у ерга фақат сурат олиш учун боришим керак бўлса-ю, Словакияга бир томчи ҳам нефть ва газ бормаслиги айтилса, у ҳолда менинг у ерга боришимнинг ҳожати йўқ. Ҳеч ким мендан хафа бўлмасин”, деган у.
Фицо Киевнинг қарорини “ўта сиёсий” деб атаган ва бу қарор Словакияга ҳам, бутун Европа Иттифоқига ҳам зарар етказишини билдирган. Бунга жавобан у электр энергияси етказиб беришни тўхтатиш, украиналик қочқинларга бериладиган нафақаларни қисқартириш, Украинанинг Европа иттифоқига аъзо бўлишини тўсиб қўйиш ва Киевга инсонпарварлик ёрдамини юборишни тўхтатиш билан таҳдид солган.
