Қозоғистон чемпионатида мавсумнинг энг чиройли голи совринини ўзбекистонлик футболчи қўлга киритди.
“Ордабаси” клуби ҳужумчиси Жасур Яхшибоев 21-турда “Астана” (2:4) дарвозасига жаримадан урган голи овоз бериш натижаларига кўра биринчи ўринни эгаллади.
Шу тариқа 27 ёшли футболчи Олег Литвиненко номидаги мукофотга сазовор бўлди.
Эслатиб ўтамиз, Яхшибоев якунланган мавсумда Қозоғистон чемпионатида 17 ўйинда 9 та гол уриб, тўпурарлар орасида тўртинчи поғонани банд этди.
Маълумот учун, ўтган мавсумни “Навбаҳор” сафида ўтказган футболчи йил бошида Қозоғистон клубига кўчиб ўтганди. Transfermarkt портали футболчининг бозор қийматини 700 минг евро этиб белгилаган. Футболчининг қозоқ клуби билан шартномаси якунига етди.
