Янги йил арафасида оиласидан узоқда қолиб кетган зукко болакай ҳақидаги “Уйда ёлғиз” комедияси ҳар йили ёш-у қари томонидан севиб томоша қилинади. Фильмнинг режиссёри Крис Колумб ва ниҳоят Кевин Маккалистернинг ота-онаси Чикагодаги кенг уй ва қишки таътилдаги қимматбаҳо саёҳатлар учун катта миқдорда пулни қандай ишлаб топгани ҳақида маълумот берди.
Тҳе Hollywood Reporter нашрига берган интервьюсида режиссёр Кевиннинг ота-онаси айнан қайси соҳада ишлагани ҳақида белги берувчи ишоралар бор эканлиги ҳақида айтди. Комедиянинг биринчи қисмида Кевин безориларни қўрқитиш учун кўплаб манекенлардан фойдаланган ва уйда зиёфат бўлаётган тасвирни деразалар орқали кўрсатишга муваффақ бўлган.
Манекенларнинг кўплигидан билиш мумкинки, Кевиннинг онаси Кейт Маккалистер дизайнер-моделер бўлган ва яхши даромадга эга бўлган.
Жон Ҳерд ижро этган ота образи — Питер Маккаллистерга келсак, у ҳақида турли назариялар бор. Аммо америкалик ёзувчи Тодд Страссер томонидан ёзилган расмий китобда айтилишича, оила бошлиғи Чикаго фонд биржасида муваффақиятли трейдер бўлиб ишлаган.
Қизиқарли маълумот:
“Уйда ёлғиз” фильмида ўғри Гарри образини яратган актёр Жо Пеши қора қалпоғи ёниб кетган эпизодда ҳақиқатда бошини куйдириб олган. Бундан ташқари, у суратга олиш жараёнида Маколей Калкин билан атайин кам гаплашган ва шу орқали безори ва ёш бола ўртасидаги динамиклик кадрда сақланиб қолишига эришган.
