Исроил қўшинлари Ғазо сектори шимолида жойлашган “Камол Адвон” касалхонасига камикадзе роботлари билан ҳужум қилди. Бу ҳақда Al Jazeera хабар берди.
Бу Исроил армияси (ЦАХАЛ) томонидан Фаластин анклавида бундай қурилмаларни қўллашнинг биринчи ҳолатидир. Яҳудий армияси шифохонани ўққа тутишда танклардан ва зарба беришда дронлардан фойдаланмоқда. Тиббиёт муассасасида 400 га яқин фуқаро, жумладан, чақалоқлар сақланмоқда.
Отишма туфайли тинч аҳолини эвакуация қилиш қийин. Шифохона директори Ҳусам Абу Сафиянинг айтишича, муассаса яқинида иккита жанговар робот портлаб, бинога зарар етказган ва 20 га яқин одам яраланган. Бундан ташқари, Дейр-эл-Балаҳ марказида гуманитар ёрдам колоннасига дрон ҳужуми қилган, оқибатда тўрт киши ҳалок бўлган. Бир кеча-кундуз ичида ЦАХАЛ зарбаларида ҳалок бўлганлар сони 26 нафарга етган.
2023 йил 7 октябрь куни Фаластиннинг ҲАМАС ҳаракати Исроилга қилган ҳужумидан кейин Яқин Шарқдаги вазият кескинлашди. Бунга жавобан Исроил Фаластин анклавини қамал қилганини эълон қилди ва Ғазо, шунингдек, Ливан ва Сурияни ўққа тутди, қуруқликдаги операцияни бошлади. Исроил ва у билан боғлиқ кемаларга ҳам ҳусийлар зарба бермоқда.
