“Барселона” клубининг собиқ бош мураббийи Хави, агар амалдаги бош мураббий Пауло Фонсека истеъфога чиқса, Италиянинг “Милан” клубини бошқариши мумкин. Бу ҳақда El Nacional хабар берди.
Манбага кўра, Хави клуб раҳбарияти билан аллақачон алоқага чиққан ва А Серия клубига мураббийлик қилиш борасида ижобий фикрдалигини маълум қилган.
Аввалроқ ОАВда Хави “Барселона”нинг собиқ футболчилари Лионель Месси, Луис Суарес, Хорди Альба ва Серхио Бускетс тўп сурадиган “Интер Майами”ни бошқаришдан бош тортгани ҳақида маълумотлар пайдо бўлганди.
Маълумот учун, Хави ўтган мавсум охирида Каталония клуби бош мураббийлигидан кетганди. Унинг қўл остида “Барселона” чемпионликни ва Испания Суперкубогини қўлга киритди.
