Қозоғистон президенти Қосим-Жўмарт Тўқаев 5 декабрь куни АҚШнинг сайланган президенти Дональд Трамп билан телефон орқали суҳбатлашди. Бу ҳақда Akorda матбуот хизмати хабар берди.
Тўқаев суҳбат бошида Трампни АҚШ президенти этиб сайланиши муносабати билан табриклади.
“Сиёсатчилар савдо, инвестициялар ва ядро қуролларини тарқатмаслик соҳаларида стратегик ҳамкорликни жадал ривожлантиришга бўлган ўзаро интилишларини тасдиқлади”, дейилади хабарда.
Шунингдек, Тўқаев халқаро кун тартибидаги энг долзарб масалалар юзасидан Қозоғистоннинг нуқтаи назарини билдирган. Икки томонлама ҳамкорликни мустаҳкамлаш мақсадида Трамп билан мунтазам алоқада бўлишга келишиб олинган.
Тўқаев Марказий Осиё давлатлари президентлари орасида биринчи бўлиб АҚШнинг янги сайланган президенти билан телефонда гаплашди.
Дональд Трамп 2024 йил 5 ноябрь куни бўлиб ўтган сайловларда ғалаба қозонди. У АҚШнинг 47-президенти бўлади. Унинг қасамёд маросими 2025 йил 20 январда Вашингтондаги Капитолий биносида ўтказилади. Республикачи ноқонуний миграцияга қарши қатъий кураш олиб бориш, АҚШнинг савдо ҳамда иқтисодий манфаатларини ҳимоя қилиш ва асосийси Украинадаги урушни лавозимига киришгач 24 соатда тугатишга ваъда берган.
