НАТО бош котиби Марк Рютте АҚШнинг сайланган президенти Дональд Трамп билан илк учрашувини ўтказди. Бу ҳақда альянс матбуот котиби маълум қилди, дея хабар беради AFP.
Учрашув кеча, 22 ноябрь куни Трампнинг Флоридадаги қароргоҳида бўлиб ўтди. Томонлар “альянс олдида турган глобал хавфсизлик масалаларини” муҳокама қилдилар, деди матбуот котиби. Трампнинг ўзи учрашув ҳақида ҳозирча изоҳ бермади.
Washington Post газетаси НАТО бош котиби Дональд Трамп билан Россия-Украина можаросини тинч йўл билан ҳал қилиш стратегиясини муҳокама қилишини ёзди.
The Wall Street Journal нашрининг ёзишича, АҚШнинг янги президентининг маслаҳатчилари фронт чизиғи бўйлаб қуролсизлантирилган ҳудуд яратиш орқали жанговар ҳаракатларни тугатишни таклиф қилмоқда. Кремль можарони музлатишдан бош тортди.
Аввалроқ Европа иттифоқи ва НАТО АҚШнинг сайланган президенти Дональд Трамп январь ойида президентликка киришиши билан унга қарши туриш учун ҳамкорликни кучайтириши хабар қилинганди.
Франциянинг Le Monde нашрининг таъкидлашича, Европа иттифоқи ва НАТО “энди ортга қарашни истамаяпти ва хавфсизликни мустаҳкамлаш учун бирдамлик ҳамда ҳамкорлик қиёфасини яратишга интилмоқда”.
“ЕИ ва НАТО бир қатор масалаларга, жумладан, ҳарбий ҳаракатчанлик, йўл қопламалари, техникалар ҳаракатланиши учун кўприклар ва туннелларни мустаҳкамлаш, шунингдек, кибертаҳдидлар ва диверсияга қарши курашиш бўйича саъй-ҳаракатларни кучайтиришга кўпроқ эътибор қаратиш ниятида”, деб ёзади нашр.
