Украина қуролли кучларида бор-йўғи 50 та ATACMS тактик ракеталари мавжуд, деб ёзади Британиянинг Times нашри.
“Пентагон ҳеч қандай маълумот бермаган бўлса-да, Киев ҳукуматида ҳозирда бор-йўғи 50 та ракета борлиги тахмин қилинмоқда. Украинада уларни учириш учун HIMARS ва MLRS ракета ташувчи қурилмалари етарли даражада”, дея таъкидлайди нашр.
Вашингтондаги Урушни ўрганиш институти маълумотларига кўра, 300 км масофага учадиган ATACMS ракеталари ҳаво базаларидан тортиб ўқ-дорилар омборларигача бўлган 245 га яқин Россия ҳарбий объектларига таҳдид солиши мумкин.
Айни пайтда Пентагон матбуот котиби Сабрина Сингх АҚШ президенти Жо Байден Украинага Россия ҳудудига зарба бериш учун Америка ракеталаридан фойдаланишга рухсат бергани ҳақидаги маълумотни тасдиқлашдан бош тортди.
Сингх, шунингдек, Россия Мудофаа вазирлигининг бир кун аввал Брянск вилояти узра ATACMS ракеталари уриб туширилгани ҳақидаги хабарига изоҳ беришни ҳам истамади.
Россия Мудофаа вазирлиги 19 ноябрга ўтар кечаси Украина Брянск вилоятидаги ҳарбий объектга ATACMS билан ҳужум қилганини маълум қилганди.
“Украина Қуролли кучлари Брянск вилоятидаги ҳарбий объектга олтита узоқ масофали ATACMS ракеталари билан ҳужум қилди”, дейилади Россия Мудофаа вазирлиги хабарида.
Аввалроқ Россия президенти матбуот котиби Дмитрий Песков Киевга Америка қуроллари билан Россиянинг ҳудудига зарба беришга рухсат бериш, кескинликнинг сифат жиҳатидан янги босқичини ва Вашингтоннинг Украинадаги можародаги иштироки даражасини кўрсатишини айтган эди.
2023 йилнинг кузида Оқ уй Миллий хавфсизлик кенгаши матбуот котиби Адриэн Уотсон Қўшма Штатлар ATACMS ракеталарини Украинага топширганини илк бор эълон қилганди. Унинг сўзларига кўра, ATACMS ракеталарининг максимал масофаси тахминан 305 км.
18 ноябрь куни The New York Times (NYT) манбаларига таяниб, АҚШ президенти Жо Байден Украина ҳарбийларига Россия ҳудудига зарба бериш учун ATACMS ракеталаридан фойдаланишга рухсат бергани ҳақида хабар қилганди.
ATACMS — узоқ масофага зарба берувчи бошқариладиган ракета бўлиб, у қўмондонларга жанговар майдонни шакллантириш учун зудлик билан ўт очиш имконини беради. У оғирлиги 500 фунт бўлган WDU18 тоифасидаги фрагментар-фугасли жанговар каллак билан жиҳозланган. Максимал учиш масофаси 300 километрни ташкил қилади. ATACMS 1980 йилларда ишлаб чиқилган ва биринчи марта 1991 йилда Форс кўрфази уруши пайтида ишлатилган. Ўшандан бери у турли қуролли можароларда, жумладан, Ироқ уруши ва Россия—Украина урушида фаол ишлатилган.
