Хитой Чжухайда бўлиб ўтадиган Аirshow Chinа 2024 халқаро аэрокосмик кўргазмасида янги J-35А қирувчи самолётини тақдим этишга тайёрланмоқда. Бу ҳақда Хитой армияси ҳарбий-ҳаво кучлари қурол-яроғ бўлими вакили полковник Нью Вэньбо маълум қилди.
Ушбу кўргазма 12—17 ноябрь кунлари Хитой жанубидаги Гуангдонг провинциясида бўлиб ўтади.
“J-35А ўрта ўлчамли кўп мақсадли қирувчи самолёт бўлиб, у Хитойнинг 15-ҳаво кучлари кўргазмасида намойиш этилади”, деди Нью Вэньбо.
Шунингдек, ушбу кўргазмада Hun-19 ракета тизими ва янги кўп функцияли ҳужум ва разведкага мўлжалланган дрон ҳам биринчи марта тақдим этилади. Шунингдек, Y-20 самолётининг юк бўлими ҳам кўрикдан ўтказилади.
“J-35А қирувчи самолётининг очиқ намойиши Хитой ҳарбий-ҳаво кучлари бир вақтнинг ўзида иккита радарларда кўринмайдиган қирувчи самолётга эга бўлишини англатади – J-20 ва J-35А. Бу борада Хитой дунёдаги иккинчи давлатга айланади. Ҳозиргача фақат АҚШда радарларда кўринмайдиган иккита қирувчи самолёт — F-22 ва F-35 бор эди”, дея тушунтирди ҳарбий эксперт Ли Ли.
Қайд этилишича, J-35 қирувчи самолётлар сериясининг бир қисмига айланиши ва келажакда кенг кўламда ишлатилиши мумкин, бу эса Хитойнинг ҳаво ва денгиз операцияларидаги умумий ҳарбий қудратини сезиларли даражада оширади.
