Украина расмийлари АҚШ томонидан Украина армиясига тақдим этилган дронлар ишламай қолаётганидан ва уларнинг аксарияти радиоэлектрон уруш воситаларини енгиб чиқа олмаслигидан шикоят қилди. Бу ҳақда The Wall Street Journal (WSJ) хабар берди.
Расмийлар, шунингдек, қурилмалар ҳавога кўтарилишида қийинчиликлар кузатилаётганини қўшимча қилган.
“Радиоэлектрон урушлар таъсирида Украинага етказилган аксарият Америка дронлари ўз йўналишидан чиқиб кетган, қулаган ёки ҳатто ҳавога кўтарилишда қийналган. Украина расмийларига кўра, улар тез-тез носозликларга учраган, ишлаши қийин ва қиммат бўлган”, деб ёзади нашр.
Аввалроқ Украинанинг Kyiv Independent нашри украиналик журналистлар Украина Қуролли кучлари дронларининг Харьков вилоятида Россиянинг радиоэлектрон уруши олдида ожиз эканига ишонч ҳосил қилганини қайд этганди.
