Шимолий Корея Украинага қарши машғулотлар ўтказиш ва жанг қилиш учун Россияга 10 мингга яқин ҳарбий юборган. Бу ҳақда Пентагон матбуот котиби Сабрина Сингх маълум қилди.
АҚШнинг дастлабки ҳисоб-китобларида ҳарбийлар сони 3000 кишини ташкил этганди. Россиянинг шарқий қисмига ўқув машғулотлари учун юборилган КХДР аскарларидан айримлари Украина чегараси яқинига жойлаштирилган.
“Аскарларнинг бир қисми аллақачон Украинага яқинлашган, Россия уларни урушда ёки Курск вилоятида украин кучларига қарши жанговар ҳаракатларни қўллаб-қувватлаш учун фойдаланиш нияти борлигидан кўпроқ хавотирга тушмоқдамиз”, деди Сингх.
АҚШ Шимолий Корея урушга кирса, Украинага қурол-яроғдан фойдаланишга киритилган чекловлар бекор қилинишини билдирди. Жанубий Корея президенти Юн Сук Ёл шимолий кореялик ҳарбийларнинг Россияга юборилиши мамлакат миллий хавфсизлигига ҳам, халқаро ҳамжамиятга ҳам таҳдид солишини айтганди. У Россия ва Шимолий Корея ўртасидаги “ноқонуний” ҳарбий ҳамкорликни қоралаган.
