Ўзбекистон терма жамоаси бош мураббий ёрдамчиси Владо Радманович ҳамда жамоа ҳужумчиси Жалолиддин Машарипов Эронга қарши учрашув олдидан матбуот анжуманида қатнашди.
“Эртага Эрон билан ўйнаймиз. Ушбу жамоа билан ўйин доимо қизиқ ва қийин бўлган. Сабаби Эрон Осиёдаги етакчи жамоалардан бири. Биз улар билан кўп бора тўқнаш келганмиз ва улар ҳақида кўп нарса биламиз. Афсуски, Катанес соғлигидаги муаммо сабаб қатнаша олмаяпти. Биз унинг йўқлигини билдирмасликка ҳаракат қиламиз”, деди мураббий.
Жалолиддин Машарипов ҳам ўйин олдидан фикр билдирди.
“Эронга қарши ўйин олдидан кўп гапириш шарт эмас. Ростдан икки жамоа ҳам бир-бирини яхши билади. Энг кераклиси, эртанги ўйинда биз керакли натижани қўлга киритишга ҳаракат қиламиз, бунга тайёрмиз. Мухлисларни хурсанд қиламиз деб умид қиламиз”, деди футболчи.
Мураббий олдинда турган ўйин олдидан қандай тактика танлаши ҳақида айтди.
“Эрон қарши ўйинда қандай тактика кутамиз? Ўйинга тактикани эртанги ўйин олдидан машғулотда футболчиларнинг жисмоний ва психологик ҳолатидан келиб чиққан ҳолда танлаймиз. Ҳужумкор ёки ҳимоявий ўйин кўрсатишимиз ўшанда маълум бўлади. Бизда 2-3 тактик схемалар мавжуд. Биз эртага 3 ёки 4 ҳимоячи билан ўйнашимиз мумкин. Ҳужумчилар борасида ҳам битта ёки 2 ҳужумчи билан ўйнаш вариантини кўриб чиқамиз.
Остон Ўрунов билан ҳам ҳаммаси жойида. Легионерлар билан муаммолар йўқ. Уларнинг ўйин амалиёти жисмоний ҳолати яхши”, деди мураббий.
Ёрдамчи мураббий эртанги ўйинга тактика ва таркиб ким томонидан тузилиши ҳақида ҳам тўхталди.
“Сречко Катанес билан доимий алоқадамиз. Албатта, ўйинга тактика ва таркибни у ҳал қилади. Учрашув давомида ҳам у билан алоқада бўламиз. Ўйин давомида ўзгаришлар киритишни ҳам у билан ҳал қиламиз”, дейди Катанеснинг ёрдамчиси.
Жалолиддин Машарипов ўтган ўйинлардаги натижалар ҳақида фикр билдирди.
“Шимолий Кореяга ва Қирғизистонга қарши ўйинларда индивидуал маҳорат эвазига ютдик деб ўйламайман. Сабаби барча голларни машғулотларда ишлаганмиз ва барчаси ўйланган тактикалар эди”.
Маълумот учун, Ўзбекистон — Эрон учрашуви эртага “Бунёдкор” стадионида бўлиб ўтади.
