Ўтган асрнинг 50 йилларида ихтиро қилинган микротўлқинли печлар озиқ-овқатни иситиш, гўштни эритиш каби кўплаб рўзғор юмушларини осонлаштирди. Аммо баъзилар ушбу техниканинг хавфсизлигидан ҳозир ҳам хавотирда.
АҚШнинг Кливленд клиникаси диетологи Пейж Уэлш озиқ-овқат ва ичимликларни иситиш учун микротўлқинли печлардан фойдаланиш саломатлик учун хавфсиз эканлигини тушунтирди.
Микротўлқинлар — паст частотали нурланишнинг бир тури бўлиб, улар ионлаштирувчи бўлмаган тўлқин сифатида таснифланади. У саратонга олиб келмайди, озиқ-овқатларни радиоактив нурлантирмайди ёки ДНКни ўзгартирмайди. Ушбу турдаги нурланиш уяли телефонлар, телевизорлар ва лампочкаларда ҳам мавжуд.
Мутахассиснинг тушунтиришича, рентген нурларида қўлланиладиган ионлаштирувчи нурланиш юқори дозаларда ҳужайраларга зарар етказиши мумкин, аммо микротўлқинлардан келиб чиқадиган ионлаштирувчи бўлмаган нурланиш молекуляр тузилмани ўзгартирмайди ва соғлиқ учун хавф туғдирмайди.
Микротўлқинли печ магнетрон деб номланувчи қурилма томонидан қувватланади. У электр энергиясини микротўлқинли энергияга айлантиради. Озиқ-овқат микротўлқинли печга қўйилганда, энергия овқатнинг сув молекулаларини тебратади. Бу тебранишлар озиқ-овқат тузилишини ўзгартирмасдан иссиқлик чиқаради. Бундай энергия миқдори одамларга зарар етказиши учун сезиларли даражада паст.
Агар микротўлқинли печ шикастланган, унинг ичида чуқурчалар, ёриқлар бўлса ёки бўёқ қисми кўчса, ундай ҳолда техника зарарли бўлиши мумкин.
