Бортида Эрон президенти Иброҳим Раисий бўлган Ми-171 вертолёти Озарбайжон билан чегарадаги Жулфа шаҳри яқинида “қаттиқ қўниш”ни амалга оширди. Бу ҳақда Associated Press хабар берди.
Президентни олиб кетаётган вертолётни топиш учун кенг кўламли қутқарув ишлари олиб борилмоқда. Ноқулай об-ҳаво шароти авиатехникага етиб боришда қийинчилик туғдирмоқда.
Президентни олиб кетаётган вертолётда Шарқий Озарбайжон губернатори Оятуллоҳ ал-Ҳошим ва ташқи ишлар вазири Амир Абдуллаҳён ҳам бўлган.
Ҳалокатдан сўнг президент ҳамроҳларидан бири марказга қўнғироқ қилган, авиаҳалокат қурбонсиз якунланишига умид катта, — деб ёзмоқда Tasnim.
Эрон президенти Озарбайжон президенти Илҳом Алиев билан учрашувдан қайтаётган бўлган. Икки давлат чегарасида тўғоннинг очилиш маросими бўлиб ўтган. Раисий кортежида жами учта вертолёт бўлган, иккита авиатехника манзилига етиб боргани таъкидланган. Ҳозирда ҳолат юзасидан Эрон томони расмий маълумот бергани йўқ.
