Эквадорда Манта шаҳри мэри Агустин Интриаго қурилиш объектини кўздан кечираётганда уюштирилган ҳужум натижасида отиб ўлдирилди, дея хабар бермоқда BBC News.
Шунингдек, ҳужум вақтида мэрнинг ёнида бўлган маҳаллий футболчи Ариана Эстефания Чанкай ҳам ҳалок бўлди.
Полиция ҳозирча ҳужум қилган шахснинг мотивини аниқлагани йўқ, бироқ аввалроқ мэрга бир неча марта таҳдид қилинганини тасдиқлади.
Расмийларнинг айтишича, Агустин Интриагога ўғирланган пикапда келган қуролли шахс томонидан бир неча марта ўқ узилган. У олган жароҳатлари оқибатида шифохонада вафот этган.
Ҳужум пайтида у янги канализация тизими қурилаётган қурилиш майдончасини кўздан кечираётганди. Las Dragonаs клубининг 29 ёшли футболчиси Ариана Чанкай эса ўша пайтда мэрнинг ёнига келиб, ҳаваскор жамоани қўллаб-қувватлашни сўраётган бўлган.
Пикап машинаси ҳайдовчиси қувиш пайтида яраланган ва ҳибсга олинган, аммо ўқ узган шахс қочиб кетишга муваффақ бўлган.
Шаҳар мэри февраль ойида иккинчи марта тўрт йиллик муддатга сайланган эди.
Бу қотиллик Эквадорни ларзага солди, у ерда яқин вақтгача сайланган амалдорларга ҳужумлар кам учрарди.
Февраль ойида Пуерто Лопес мэрлиги учун курашаётган сиёсатчи сайлов участкалари очилишидан бир неча соат олдин ўлдирилган эди.
