Украина президенти Владимир Зеленский Россия билан зиддиятда ўз мамлакатини хавф остига қўяди. Бу ҳақда КХДР етакчисининг синглиси, Шимолий Корея Меҳнат партияси Марказий қўмитаси бўлим бошлиғи ўринбосари Ким Ё Чжон маълум қилди.
Шу тариқа Ким Ё Чжон Украина президенти сайтида АҚШ ядро қуролини ўз ҳудудига жойлаштириш ёки ўзининг ядровий арсеналини яратишга чақирувчи петицияга муносабат билдирди. У петиция “жамоатчилик фикрининг асосли бўлишига қарамай, Зеленский расмийларининг айёр сиёсий манёври натижаси” эканини айтди.
“Украина расмийлари ядровий амбициялари ҳақида бир неча марта, жумладан, 2022 йил Мюнхен Хавфсизлик конференциясида Зеленский мамлакатнинг ядро қуроли мақомини тиклаш ниятини эълон қилганида ҳам очиқ гапиргани ҳаммага маълум”, — деди КХДР расмийси.
У Украина расмийлари “даволаб бўлмайдиган мегаломаниядан азият чекаётгани” ва гўёки Россия устидан ҳокимиятни қўлга олиш ниятидалигини қайд этди.
“Зеленскийнинг АҚШ ядровий арсеналига қўшилиш ва ўзининг ядровий арсеналини ривожлантириш ҳақидаги риторикаси ўта хавфли сиёсий амбиция бўлиб, ўз терисини сақлаб қолиш учун мамлакати ва халқининг тақдирини хавф остига қўйишни англатади”, — дейди Ким Ё Чжон.
КХДР етакчисининг синглиси Украина расмийларида “ҳеч қандай сиёсий сезгирлик йўқ”лиги ва улар “ўз халқини ҳалокатга” олиб бораётганини айтди. Ким Е Чжон Украина расмийлари “АҚШ ядровий соябон” остида “Россиянинг қудратли оловидан” қутулмоқчилиги, КХДРда бу Украина учун “охирги” йўл ҳисобланишини айтди.
