Сурия Россиянинг Донецк ва Луганск халқ республикалари, Херсон ва Запорожье вилоятларини қўшиб олиш билан ҳосил бўлган “янги чегаралари”ни тан олади. Бу ҳақда Сурия президенти Башар Асад Москвага ташрифи чоғида маълум қилди.
“Албатта. Мен буларни Россия ҳудудлари дейман, агар уруш бўлмаганида ҳам, бу ҳудуд тарихан Россияга тегишли”, — деди Сурия раҳбари “РИА Новости” агентлигига берган интервьюсида.
Асад Сурия бу ҳудудларни Россияга қўшилишидан олдин ҳам тан олганини эслатди. Унинг таъкидлашича, Damasҳқ тарихий фактларга асосланган “аниқ ва қатъий” позициясида туради.
“Ҳудудлар Украинага 100 йиллар олдин, фикримча (Владимир) Ленин даврида берилган бўлса керак. Уларда Россия фуқаролари истиқомат қилади ва фактлар бу ер рус ерлари эканини кўрсатади”, — дея хулоса қилди Асад.
Сурия президенти Башар ал-Асад 14 март куни кечқурун Москвага учиб келди. Кремлда Россия етакчиси Владимир Путин билан музокаралар ўтказди. Кремлнинг қайд этишича, музокаралар чоғида икки томонлама муносабатлар, Суриядаги можарони тартибга солиш, шунингдек, бутун Араб республикасидаги вазият муҳокама қилинган.
2022 йил сентябрда Украина таркибидаги Луганск ва Донецк халқ республикалари, Херсон ва Запорожье вилоятларини Россияга қўшиб олиш бўйича “референдумлар” ўтказилган. Кремлда 30 сентябрь куни Россия таркибига “янги ҳудудларни” қабул қилиш бўйича келишувларни имзолаш маросими бўлиб ўтган.
Маълумот ўрнида, дунёнинг аксарият мамлакатлари каби Ўзбекистон ҳам Луганск ва Донецк мустақиллигини тан олмайди. Ўзбекистон Украина ва Россия атрофидаги вазият бўйича “вазмин, нейтрал позицияда”.
