АҚШ Транспорт департаменти Илон Маскнинг мия чиплари ишлаб чиқарувчи Neuralink компаниясига нисбатан текширув бошлади. Бу ҳақда CNBC хабар берди.
Neuralink компанияси аппаратларни нотўғри қадоқлагани ва ташигани, бу эса инсонлар учун хавфли бўлган патогенларни келтириб чиқаргани айтилмоқда. “Тиббиётга маъсул шифокорлар қўмитаси”нинг ҳайвонларни ҳимоя қилувчи гуруҳи шу ҳафта АҚШ транспорт вазири Питт Бутижичга мактуб юборган. Унда ташкилот вакиллари 2019 йилда Neuralink приматларнинг миясидан олинган қурилмаларни нотўғри ишлатган бўлиши мумкинлигини кўрсатувчи ҳужжатларга эгалиги келтирилади.
Ускуналарда герпес B вируси ва антибиотикларга чидамли патогенлар, жумладан стафилококк ва клебсиелла бўлиши мумкин. Транспорт вазирлиги тергов “стандарт амалиёт" экани ва у жамоат хавфсизлигини таъминлаш учун ўтказилаётганини таъкидлади.
Нуэралинк қандай компания?
Neuralink ташқи қурилмаларни фикр кучи билан бошқаришга ёрдам берадиган микрочип ишлаб чиқмоқда. У фалаж одамларнинг миясига ўрнатилганда уларга турли ҳаракатларни бажаришга ёрдам бериши керак. Компания ҳайвонлар устида кўплаб тажрибалар ўтказган. Neuralink декабрь ойида ҳайвонларга нисбатан шафқасизликда айбланган, унга қарши терговни бошланганди.
