Телебошловчи ва блогер Ксения Собчак 25 октябрдан 26 октябрга ўтар кечаси Россияни тарк этиб, Беларусь орқали Литвага ўтиб кетди, деб хабар қилади «ТАСС».
«У Москвадан кечки пайт (25 октябрь) жўнаб кетган. Шу билан бирга, у интернет орқали кеча Дубайга, бугун эса Туркияга авиачипталар сотиб олган. У тезкор ходимларни чалғитиш учун шундай қилган. Натижада у Беларусь орқали Литвага киришга муваффақ бўлди», — дейди манба. Манбанинг қайд этишича, терговчиларда Собчакни ҳибсга олиш ҳақидаги қарори бўлган, бироқ у қочиб кетган.
Аввалроқ Собчакнинг Москва вилоятидаги уйида тинтув ўтказилгани ҳақида хабар берилган эди.
Собчак «Осторожно, медиа» («Эҳтиёт бўлинг, матбуот») лойиҳасини бошқаради, у янгиликлар Telegram каналлар ва пабликларини, подкастлар студиясини, шунингдек, Собчакнинг ижтимоий тармоқларини ўз ичига олади.
Собчак — телебошловчи ва сиёсатчи, 2018 йилда у Россия президенти сайловида қатнашиб, 1,68 фоиз овоз билан тўртинчи ўринни эгаллаган. 2019 йилдан буён «Эҳтиёт бўлинг, Собчак!» YouTube каналини юритиб, янгиликлар шарҳлари ва таниқли шахслар билан интервьюларни жойлаб боради.
