Франция президенти Эммануэль Макрон украиналик ҳамкасби Владимир Зеленский билан телефон орқали мулоқот қилди. Бу ҳақда BFM телеканалига таяниб, «ТАСС» хабар берди.
«Президентлар ўртасидаги суҳбат туш пайти бошланган эди ва ҳозиргина якунига етди», — дейилади хабарда. Телеканал маълумотларига кўра, бу Макрон ва Зеленский ўртасидаги Франция президентининг 16 июнь куни Киевга ташрифидан кейинги илк суҳбати. BFM маълумотларига кўра, кун тартибидаги мавзулардан бири Украина донининг Одессадан экспорт қилиниши тўғрисида гаплашиш эди.
Елисей саройи ҳозирча суҳбат ҳақида ҳеч қандай тафсилотларни расман эълон қилмаган.
Эслатиб ўтамиз, 22 июль куни Истанбулда жаҳон бозорига озиқ-овқат ва ўғит етказиб бериш муаммосини ҳал этиш бўйича ҳужжатлар тўплами имзоланган. Россия ва БМТ ўртасидаги меморандумда жаҳон ташкилоти қишлоқ хўжалиги маҳсулотлари ва ўғитлар экспортига тўсқинлик қилувчи Россияга қарши чекловларни олиб ташлаш бўйича ишларда иштирок этиши белгилаб қўйилган.
Яна бир ҳужжат Украина томонидан назорат қилинадиган Қора денгиз портларидан донни экспорт қилиш механизмини белгилайди. Россия, Туркия, Украина ва БМТ ўртасидаги келишувлар тўрт томонлама мувофиқлаштириш марказини ташкил этишни назарда тутади, унинг вакиллари қурол-яроғ контрабандаси ва провокацияларнинг олдини олиш мақсадида дон кемаларини текширади.
