Ўзбекистон халқ артисти Тўти Юсупова 85 ёшида вафот этганлиги ҳақидаги хабарлар ёлғонлиги маълум қилинди. Бу ҳақда Ўзбек миллий академик драма театри директори ўринбосари Асадилло Набиев «Дарё» мухбири Феруз Муҳаммадга маълум қилди.
Устозимиз соғ-у, саломатлар. Интернет оламида нима сабабдан бундай ёлғон хабар тарқалганига ҳайронман, — дейди Асадилло Набиев.
Ўзбекистон халқ артисти Тўти Юсупованинг вафоти ҳақидаги хабарларни даставвал таниқли сухандон Толибжон Исроилов ўзининг Instagram саҳифасида ёзиб қолдирган эди.
«Ўзбекистон халқ артисти, миллий театримиз дарғаларидан бири, беқиёс маҳоратли актриса, ниҳоятда нурли ўзбек аёли, онаси Тўтихоним Юсупова оламдан ўтибди. Асллар кетяпти... Аллоҳ жаннатидан жой берсин! Инна лиллаҳи ва инна илайҳи рожиун!», — деб ёзаганди Толибжон Исроилов.
Толибжон Исроиловдан сўнг хонанда Мавлуда Асалхўжаева ҳамда актриса Феруза Собитовалар ҳам ижтимоий тармоқлардаги саҳифаларига Тўти Юсупова вафот этганлиги ҳақида постлар жойлади.
Ўзбекистон Кинематография агентлиги ҳам актрисанинг вафот этгани муносабати билан таъзия билдирган эди.
Маълумот учун, Тўти Юсупова 1936 йилнинг 10 март куни Самарқанд вилоятида таваллуд топган. Тошкент театр ва рассомлик институтини тамомлаган. 1957 йилдан ўзбек миллий академик драма театрида фаолият юритган. Театр саҳнасида Ҳафиза (Абдулла Қаҳҳор, «Шоҳи сўзана»), Sonyа (А.Чехов, «Ваня тоға»), Қорасоч (Уйғун, «Шубҳа»), Ҳожар (А.Қаҳҳор, «Тобутдан товуш»), Нури (Ойбек, «Қутлуғ қон»), Она (Э’ Роблес, «Ўлимдан кучли»), Хонзода (Ҳамза, «Бой ила хизматчи»), Шафақ (М. Карим, «Ой тутилган тунда»), Раҳима (Ў. Умарбеков, «Комиссия»), Сотти (С.Аҳмад, «Келинлар қўзғолони»), Фотима, Зеби (Ў.Умарбеков, «Шошма қуёш», «Қиёмат қарз»), Нодира (Т.Тўла, «Нодира»), Мастура (Ҳамза, «Паранжи сирлари») каби турли қаҳрамонлар образини яратди. Шунингдек, актриса кинода самарали фаолият юритган.
Тўти Юсупова 1994 йилда Ўзбекистон халқ артисти унвонини олган, 2020 йилда «Меҳнат шуҳрати» ордени билан тақдирланган.
