Америкалик тадбиркор, Tesla ва SpaceX компанияларининг асосчиси Илон Маск Endeavor Group ҳолдинг директорлар кенгашига номзод қилиб кўрсатилди. Бу ҳақда Tengrinews хабар берди.
Ҳолдинг АҚШнинг қимматли қоғозлар бўйича комиссиясига (SEC) керакли ҳужжатларни топширди. Гуруҳнинг баёнотига кўра, Маск ҳолдинг директорлар кенгашига киритилади. Бу тайинлов IPO (initial public offering — акцияларнинг бошланғич оммавий таклифи) учун нарх белгилаш даврида ёки ундан олдин ҳам бўлиши мумкин.
Endeavor Group аралаш яккакураш бўйича UFC турнири ва «Коинот гўзали» (Miss Universe) танловининг таъсисчиси ҳисобланади. Унинг асосчиси Голливуднинг энг машҳур продюсерларидан бири Ари Эмануэл бўлиб, у кўп йиллар давомида Маскнинг мухлиси бўлган.
Қатор бирлашишлар натижасида компания оммавий ахборот воситалари ва кўнгилочар дастурлар конгломератига (иқтисодиётнинг турли соҳаларида тадбиркорлик фаолияти билан шуғулланадиган компаниялар бирлашмаси) айланди. Компания UFC, Miami Open, New York Fashion Week, Frieze санъат ярмаркаси ва «Коинот гўзали» халқаро танловига эгалик қилади ва бошқаради.
«Ўзининг жамоат компаниясини бошқариш бўйича профессионал тажрибаси, аввалги бошқарув лавозимлари, бошқа жамоат компаниялари кенгашларидаги фаолияти ва бизнесни йўлга қўйиш, ривожлантириш ҳамда интеграциялашдаги кўникмалари учун Маск бизнинг директорлар кенгашимизга аъзо сифатида танланди», — дейилади компания хабарида.
Таъкидланишича, Эмануэл оиласи Маск билан биринчи марта ҳамкорлик қилмаяпти. Агентнинг ўзи Tesla фаолиятининг дастлабки босқичида компания мухлисига айланган ва компания ишлаб чиқарган Roadster электромобилининг илк нусхаларидан бирига буюртма берган.
Аввалроқ Илон Маск бош директор унвонига компаниянинг «техноқироли» унвонини қўшиб қўйгани ҳақида хабар берилган эди.
Шунингдек, Tesla маркасининг капитализацияси 605 миллиард долларга етиб, дунёдаги энг қиммат автомобиль компаниясига айланди ва 24 март куни ўз маҳсулотлари учун биткоинлар билан тўлаш имкониятини қўшди.
