Профессионал бокснинг супер ўрта вазн (-76,2 кг) тоифасида рингга чиқаётган Бектемир Мелиқўзиев (6-0, 5 КО) ва ярим оғир вазн тоифасида WBA Super, IBF, WBO чемпионлик камарларининг собиқ соҳиби Сергей Ковалёв (34-4-1, 29 КО) ўртасидаги жанг бекор қилинди. Бу ҳақда BoxingScene хабар қилди.
Аввалроқ россиялик боксчининг қон таҳлилларидан тақиқланган модда (синтетик тестостерон) топилгани маълум бўлганди. Бироқ Ковалёв жамоаси бу натижалардан норози ва VADA'дан қайта тест олишни талаб қилмоқда.
Мелиқўзиев нима бўлган тақдирда ҳам жангга тайёр эканини маълум қилганди.
Ўзбекистонлик боксчи билан ҳамкорлик қиладиган Golden Boy компанияси Бектемирга 2021 йилда бошқа муносиб жанг ташкил қилиб беришга ваъда берган. BoxingScene хабарига кўра, Мелиқўзиев навбатдаги жангини 13 февраль куни ўтказиши мумкин.
Ковалёв ва Мелиқўзиев ўртасидаги жанг 30 январь кунига белгиланганди.Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
