Германияда коронавирусга қарши эмланган 10 нафар кекса инсон вафот этди. Бу ҳақда Германиядаги ҳар ҳафта чоп этиладиган Der Spiegel журналига таяниб, «РБК» хабар берди.
«Вафот этганларнинг барчаси оғир касал бўлган», — дейди фармакологик клиника соҳасидаги эксперт Бриджит Келлер-Станиславски. Унинг сўзларига кўра, улар кекса ёшдаги инсонлар бўлган.
Паул Эрлих номидаги Вакциналар ва биотиббиёт дори воситалари федерал институтининг маълум қилишича, вакцинациядан кейин 325 кишида салбий асоратлар кузатилган. Ҳозирга қадар мамлакатда 600 мингдан ортиқ одам коронавирусга қарши эмланган. Келлер-Станиславскининг таъкидлашича, салбий асоратлар асосан вакцина билан эмланган 60 ёшдан катталарда кузатилмоқда.
Паул Эрлих институти президенти Клаус Чичутекнинг маълум қилишича, Германияда фойдаланилаётган вакцина хавфсиз ва самарали. Мамлакатда Американинг Pfizer ва Германиянинг BioNTech компаниялари ҳамкорлигида яратилган ҳамда Moderna вакциналаридан фойдаланиляпти.
Аввалроқ Норвегияда Pfizer вакцинаси билан эмланган 23 киши вафот этгани тўғрисида хабар берилганди. Шунингдек, Исроилда Pfizer вакцинаси билан эмланган эркак юрак хуружидан, португалиялик шифокор вакцинациядан сўнг вафот этган.Мавзуга доир: АҚШда Pfizer вакцинаси билан эмланган икки тиббиёт ходимининг аҳволи ёмонлашди
