Туркия президенти Ражаб Тоййиб Эрдўғон Telegram’да ўзининг расмий каналини очди. Бу ҳақда президентинг Twitter’даги саҳифаси орқали хабар берилди.
Эрдўғоннинг аккаунти верификацияланган. Туркия президенти ўзининг биринчи постида мессенжерда аккаунт очганини маълум қилган ва мушукнинг суратини жойлаштирган.
«Эҳтимол, Эрдўғон Telegram’да расмий каналини очган хориж президентларидан биринчисига айланди», — деб ёзади Meduza.
Мазкур хабарни ёзиш вақтида унинг каналига 151 мингдан ортиқ фойдаланувчи обуна бўлган.
Anadolu’нинг ёзишича, Туркияда фойдаланувчилар WhatsApp фойдаланиш шартларини янгилаганидан сўнг, Dedi ва BiP мессенжерларидан фойдаланишга ўта бошлаган. Агентликнинг маълумотларига кўра, 10 январь ҳолати бўйича бир сутка ичида BiP фойдаланувчилари сони (Туркиянинг Turkcell мобил оператори томонидан яратилган) 1,24 миллионга ошган.
Telegram асосчиси Павел Дуров 12 январь куни сўнгги 72 соат ичида Telegram’да 25 миллион киши қўшилганини маълум қилган. Мессенжернинг умумий фойдаланувчилари сони 500 миллионга етган.
