Пентагон COVID-19 коронавируси лаборатория шароитида эмас, табиий усулда келиб чиққан деб ҳисобламоқда, аммо разведкада бу борада якуний хулосалар йўқ. Бу ҳақда АҚШ Қуролли кучлари штаб бошлиқлари қўмитаси раиси, генерал Марк Милли маълум қилган.
Унинг айтишича, айни пайтда бу борадаги фикрлар ҳали якуний эмас, аммо аксарият далиллар вируснинг табиий усулда келиб чиққанидан далолат бермоқда.
Генералнинг айтишича, бу мавзуда ОАВ, сайт ва блогларда жуда кўп миш-мишлар тарқалмоқда. «Ҳеч ажабланарли жойи йўқки, биз бунга катта қизиқиш билдирдик ва бу масалани жиддий ўрганиб чиқиш учун кўп маълумотларга эгамиз», — дея унинг сўзларини келтирмоқда Reuters.
Аввалроқ АҚШ давлат котиби коронавирус пандемиясида айбдорлар жавобгарликка тортилишини айтганди.
Жонс Ҳопкинс маълумотларига кўра, айни пайтда дунё бўйича коронавирусга чалинганлар сони 1 миллион 982 минг кишидан, вафот этганлар сони 126 минг кишидан ошди. АҚШда коронавирус билан касалланганлар сони 600 минг кишидан ошиб кетди, Ўзбекистонда эса 1214 кишига етди.
