АҚШда Консерватив сиёсий ҳаракатлар конференциясига ташриф буюрган меҳмонларнинг биридан олинган таҳлил намуналари унда коронавирус борлигини кўрсатди. Бу ҳақда тадбир ташкилотчиси ҳисобланган Америка консерватив иттифоқи (ACU) маълум қилди. 26—29 февраль кунлари Мериленд штатидаги Форт-Вашингтонда бўлиб ўтган тадбирда Оқ уйнинг кўплаб амалдорлари қатнашган эди.
Бу йилги конференцияда АҚШ президенти Дональд Трамп ва вице-президент Майк Пенс чиқиш қилган эди. ACU вакилларининг маълум қилишича, бемор Трамп ва Пенс билан мулоқотда бўлмаган, шунингдек, асосий залдаги тадбирларда қатнашмаган. Касалланган шахс карантинга олинган, у Нью-Жерсида шифокорлар назоратида бўлиб турибди. Қўшимча қилишларича, президент маъмурияти вазиятдан бохабар.
Оқ уй вакиллари конференция иштирокчиларидан бири коронавирусга текширилганидан хабардорлигини билдирди. «Ҳозирда президент Трамп ва вице-президент Пенс касалланган ташрифчи билан учрашгани ёки у билан яқин келганини тасдиқловчи бирор белги йўқ», — дея президент маъмурияти баёнотидан иқтибос келтирмоқда CNN.
Business Insider‘нинг қайд этишича, конференцияда 19 мингга яқин одам қатнашган. Трамп унинг сўнгги кунида — 29 февралда нутқ билан чиқиш қилган. Мериленд штати губернатори Ларри Ҳоган форумнинг исталган ташрифчиси касалланиш хавфи остида эканини айтиб, кимда вирус аломатлари пайдо бўлса, зудлик билан шифокорларга мурожаат қилишга чақирди.Мавзуга доир: АҚШда вице-президент ва давлат котиби қатнашган конференциянинг икки иштирокчисида коронавирус аниқланди
АҚШ Касалликлар назорати ва профилактикаси марказлари маълумотларига кўра, АҚШда коронавирус юқтириб олиш билан боғлиқ 164 та ҳолат аниқланган, 11 киши вафот этган. Касаланиш ҳолатлари 19 та штатда қайд этилган. 76 киши касалланган Нью-Йорк штатида фавқулодда ҳолат эълон қилинган.
