Tesla автомобиллари ишлаб чиқарувчи компаниянинг бир дона акциялари рекорд даража — 420 долларга етди. CNBC’нинг ёзишича, айнан шу нарх сабабли Илон Маск ярим йил аввал компания акцияларини қайтариб олишга ваъда берганди.
Макс ҳам Tesla акциялари нархига эътибор берган. «Вау, акциялар роса кўтарилибди», — деб ёзган у Twitter’даги саҳифасида.
Meduza’нинг ёзишича, Илон Маск Twitter’даги саҳифасида 2018 йилнинг август ойида Tesla акцияларини бир донасини биржадан 420 доллардан сотиб олишга тайёрлигини билдирган. Ўша вақтда акциялар савдоси тахминан 350 доллардан бўлган. Маск ушбу операциялар молиялаштирилиши кафолатланганига ишонч билдирган.
АҚШ қимматли қоғозлар ва биржа бўйича комиссияси Илон Маск инвесторлар билан Tesla акцияларини сотиб олиш режаларини муҳокама қилмаганлигини, у ўзининг твити билан бозор иштирокчиларини атай янглиш фикрга боришга мажбур қилганини билдирган.
Ҳукумат ўртасидаги низога барҳам бериш мақсадида Маск 20 миллион доллар тўлаган ва Tesla директорлар кенгаши раҳбари лавозимини тарк этган (у компания бош директори вазифасида қолган).
АҚШ қимматли қоғозлар ва биржа комиссияси томонидан текширув бошланганидан сўнг Илон Маск Tesla оммавий компания бўлиб қолишини маълум қилган.
