Эрон ахборот технологиялари ва алоқа вазири Муҳаммад Жавод Азарий-Жаҳромий АҚШ президенти Дональд Трампнинг ИШИД етакчиси Абу Бакр ал-Бағдодийнинг ўлдирилгани ҳақидаги қувончли мурожаатига муносабатини билдирди ва Америка етакчисининг хурсандчилиги ортида ёлғон яширинганлигини қайд этди. Бу ҳақда «Iran.ru» хабар берди.
«Воажаб! Сиз шунчаки ўзингиз яратган муаммони йўқ қилдингиз», — деб ёзган Жаҳромий Twitterда АҚШ президенти Дональд Трампнинг «Ҳозиргина оламшумул воқеа содир бўлди!», — деган твитига жавобан.
«Ўтган оқшомда Қўшма Штатлар дунёдаги биринчи рақамли террорчини жазолади. Бағдодий телба ва ахлоқий бузуқ одам эди ва энди у йўқ», — дея таъкидлаган Дональд Трамп.
Washington Post нашрига кўра, Трамп Америка ҳарбийлари ўтказган тунги операцияни жасорат намунаси эканлигини қайд этган ва отишмалар вақтида Бағдодийнинг яширин туннелга беркиниб олганлигини айтган.
Ғарб нашрларининг ёзишича, Бағдодий туннел ичида ўз танасига ўрнатилган бомбани фаоллаштириб ўзи ва оиласини портлатган.
Россия мудофаа вазирлиги ИШИД етакчисининг тунги рейд вақтида ўлганлигига, АҚШ ҳарбийларининг ушбу операцияни ўтказганлигига ҳам шубҳа билан қарамоқда. Вазирлик вакилининг сўзларига кўра, Идлиб вилоятидаги Бағдодий жойлашган дея тахмин қилинган ҳудудга авиазарба берилмаган.Мавзуга доир: ИШИД етакчиси Абу Бакр ал-Бағдодий қандай йўқ қилинди?
Аввал Абу Бакр ал-Бағдодий Суриянинг Идлиб вилоятида АҚШ ҳарбийларининг ҳаводан йўллаган ҳужуми натижасида ўлгани, ИШИД раҳнамоси бўлган Бағдодий ўрнини унинг икки ёрдамчисидан бири эгаллаши хабар қилинган. Кейинчалик ИШИД собиқ раҳбарининг жасади қолдиқлари денгизга оқизилиши ва ташкилот раҳбарлигини келиб чиқиши туркман миллатига мансуб ироқлик собиқ зобит Абдулла Қардош эгаллаши маълум бўлган.ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
